Şəmkir Rayon Mərkəzi Xəstəxanasının həkimləri tərəfindən Kür qəsəbəsindəki 1 nömrəli məktəbdə "Narkomaniyaya yox deyək!" adlı maarifləndirici tədbir keçirilib.
Bu barədə Aztibb.az-a Şəmkir Rayon Mərkəzi Xəstəxanasından məlumat verilib.
Tədbirdə bildirilib ki, ölkəmizin işıqlı və gözəl gələcəyi məhz sağlam, savadlı gənclikdən asılıdır. Hər bir yeniyetmə və gənc zərərli vərdişlərdən uzaq durmalı, diqqətini təhsilə, idmana yönəltməlidir. Bu cür görüşlərin keçirilməsində əsas məqsəd məhz yeniyetmə və gəncləri narkomaniyanın və digər zərərli vərdişlərin mənfi nəticələri, doğurduğu fəsadlar barədə məlumatlandırmaq, onları belə mənfi əməllərdən çəkindirməkdən ibarətdir. Çünki narkotik vasitələrdən istifadə edərək özünü fiziki və psixoloji cəhətdən məhvə aparan insan nə yaxınları, nə də cəmiyyət üçün layiqli vətəndaş ola bilməz.