Minilliklər boyu bəşəriyyət mikroblardan həm yararlanıb, həm də zərər görüb. Çörək və içki hazırlamaq üçün mayadan istifadə ən erkən nümunələrindən biridir. 

Aztibb.az solenka.info-ya istinadən xəbər verir ki, elm adamları təbii hüceyrələr üçün əlçatmaz mühitlərdə yaşaya bilən yarıcanlı "kiborq hüceyrələr" yaradıblar.

Sintetik biologiya mühəndislik prinsipləri ilə bioloji sistemlərə və orqanizmlərə yeni imkanlar təqdim edir. Canlı hüceyrələr dərman hazırlamaq, maddələri parçalamaq, hətta məlumatları saxlamaq üçün genetik olaraq dəyişdirilə bilər. Yaxud alimlər sıfırdan tamamilə yeni sintetik orqanizmlər yarada bilərlər.

Kaliforniya Universitetinin tədqiqatçılarının yaratdığı “kiborq hüceyrələr” maddələr mübadiləsi, hərəkət və zülal istehsalı da daxil olmaqla, bioloji fəaliyyətlərin çoxunu həyata keçirə bilər, lakin onlar bölünə və böyüyə bilmirlər. Bununla belə, onları proqramlaşdırmaq mümkündür.

Bu hüceyrələr xəstəliklərin diaqnozu, eləcə də xüsusi orqan və toxumalara dərmanların çatdırılması üçün istifadə edilə bilər.

Tədqiqatçılar “kiborq hüceyrələr”inə daha yaxşı nəzarət etməyin yollarını tapmaq və onlar üçün potensial tətbiqləri sınaqdan keçirmək üçün tədqiqatları davam etdirməyi planlaşdırırlar.