Balakən Rayon Mərkəzi Xəstəxanasında “Vərəm xəstəliyi və onunla mübarizə” mövzusunda maarifləndirici tədbir təşkil olunub.
Xəstəxanadan Aztibb.az-a verilən xəbərə görə, tədbirdə Balakən rayon İcra başçısının müavini Nəzakət Rüstəmova, Balakən Rayon Mərkəzi Xəstəxanasının rəhbərliyi, Balakən Rayon Təhsil şöbəsinin müdiri Elçin Musayev, GEM-müdiri Elnarə Mustafayeva, eləcə də kənd həkim və tibb məntəqə müdirləri, məktəb direktorları, kənd bələdiyyə və digər müəssisə nümayəndələri iştirak ediblər.
Tədbiri giriş sözü ilə açan Nəzakət Rüstəmova bildirib ki, tədbirin keçirilməsində məqsəd Azərbaycanda vərəmlə bağlı mövcud vəziyyəti müzakirə etməkdir.
Daha sonra Balakən Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Aynur Omarova vərəmin yaranma şəraiti, yoluxma halları, Balakən rayonunda və ölkədə illər ərzində olan vərəm statistikası, hazırda olan mövcud vəziyyət barədə məlumat verib.
Tədbirdə Balakən Rayon Mərkəzi Xəstəxanasının direktoru Dilbər Quliyeva səhiyyə sektorunda aparılan islahatlarda infeksion xəstəliklərin qarşısının alınmasına xüsusi əhəmiyyət verildiyini, o cümlədən vərəmə qarşı mübarizə məsələlərinin diqqət mərkəzində saxlanıldığını vurğulayıb.
Poliklinika şöbəsinin müdiri Əhmədov Məhəmməd və GEM müdiri Elnarə Mustafayeva vərəmin yoluxma dərəcəsi, onun mərhələləri, müalicə müddəti, məktəblərdə və müəssisələrdə vərəmdən qorunma yolları haqqında ictimaiyyətə məlumatlar veriblər.
Vurğulanıb ki,uşaqlara vurulan vərəm əleyhinə peyvənd vərəmə yoluxma riskini azaldır və ən əsası bu infeksiyanın digər ağır formalarının baş verməsinin qarşısını alır.
Sonda vərəmin Azərbaycanda yayılmasının qarşısının alınması və müalicəsi ilə bağlı müzakirələr aparılıb.
