44 günlük Vətən müharibəsinin könüllü iştirakçısı 1990-cı il təvəllüdlü Mingəçevir şəhər sakini Muradov Orxan Fazil oğlu Mingəçevir Şəhər Mərkəzi Xəstəxanasının Cərrahiyyə şöbəsində müalicə olunur.

Bu barədə Rayon Xəstəxanasından Aztibb.az-a məlumat verilib.

Vətən müharibəsində iştirak edərək şücaətlər göstərən, cənab Prezidentin müvafiq sərəncamları ilə medallarla təltif olunan Orxan Muradov Laçın istiqamətində gedən gərgin döyüşlərdə çoxsaylı qəlpə yaraları almışdır. Zəfərlə başa çatan müharibədən keçən iki il ərzində o, ölkənin bir çox tibb müəssisələrində müalicə almasına baxmayaraq ayağındakı qəlpələr fəsadlar göstərməyə başlamışdır. Təəssüf ki, bu səbəbdən bir neçə gün öncə paytaxt Bakıda TƏBİB-in tabeliyində fəaliyyət göstərən tibb müəssisələrinin birində gənc qazinin sol aşağı ətrafı dizaltı nahiyyədən amputasiya olunmuşdur.

Hazırda qəhrəman döyüşçünün müalicəsi Mingəçevir Şəhər Mərkəzi Xəstəxanasında davam etdirilir.

Allah şəfa versin!