Səhiyyə Nazirliyi Respublika QİÇS-lə Mübarizə Mərkəzində (RQMM) regional laboratoriyaların tibb işçilərinin bacarıq və qabiliyyətlərinin artırılması məqsədilə təlim keçirilib.

Mərkəzdən Aztibb.az-a bildirilib ki, tədbirdə çıxış edən RQMM-in direktoru Famil Məmmədov sağlamlığa ciddi maneə olan immun çatışmazlığı virusunun (İİV) ölkəmizdə yayılmasının qarşısının alınmasının önəmindən bəhs edib, bu sahədə çalışan həkimlərin, digər tibb işçilərinin, əhalinin təhlükəsiz həyat tərzi barədə biliklərinin artırılmasının vacibliyini vurğulayıb.

Direktor bildirib ki, İİV infeksiyası və QİÇS assosiasiyalı xəstəliklərin erkən diaqnostikası, müalicəsi İİV/QİÇS-lə mübarizədə aktual problemlərdəndir.

İştirakçılara İİV-ə nəzarətin qanunvericiliyin tələblərinə uyğun tənzimlənməsi, eləcə də tibbi etika, təhlükəsizlik qaydaları və dezinfeksiya məhlullarından düzgün istifadə ilə bağlı ətraflı məlumat verilib.

Daha sonra həkim-laborantlar Günel İsmayılova və Vəfa Babayevanın “İİV-ə müayinələr üçün qanın götürülməsi, saxlanması, daşınması prosedurları” adlı təqdimatları dinlənilib.

İnteraktiv şəraitdə keçən tədbirdə iştirakçıların sualları dolğun cavablandırılıb.