Xəstəxanadan Aztibb.az-a bildirilib ki, tədbirdə tibb müəssisəsinin direktoru Rasim Əkbərov çıxış edərək mövzunun əhəmiyyətindən danışıb. Direktor qeyd edib ki, hər kəs öz sağlamlığının qeydinə qalmalı, davamlı fiziki aktivliklə, sağlam qidalanmaqla bu xəstəliyə qalib gəlməli, onu həyat tərzinə çevirməlidir.

 

Daha sonra Azərbaycan Tibb Universitetinin Daxili xəstəliklər kafedrasının assistenti, endokrinoloq Könül İsmayılova şəkərli diabetin yayılma statistikası haqqında məlumat verib. Bildirib ki, Ümumdünya Səhiyyə Təşkilatının tədqiqatlarına əsasən, 2030-cu ildə şəkərli diabetdən vəfat edənlərin sayına görə, bu xəstəlik 7-ci yerdə qərarlaşacaq. Şəkərli diabetə tutulmuş insanların sayı gündən-günə artır. Lakin bu o demək deyil ki, diabetli insan normal həyat sürə bilməz.

 

Könül İsmayılova  qeyd edib ki, şəkərli diabeti vaxtında müəyyənləşdirib onunla mübarizə aparsaq, diabetin fəsadları ilə qarşılaşmarıq: "Bu gün milli səhiyyəmiz davamlı inkişaf edir. Bütün xəstəliklərin, o cümlədən də şəkərli diabetin insan həyatı üçün təhlükəli olmasının qarşını almaq mümkündür. Bunun üçün diabeti nəzarətdə saxlamaq və sağlam həyat tərzi keçirmək kifayətdir".

 

Tədbirdə iştirak edən şəkərli diabet xəstələrini maraqlandıran suallar cavablandırılıb.

 

Sonda layihənin gerçəkləşməsində əməyi olan insanlara və təşkilatlara təşəkkür edilib. İştirakçılara təşkilatçılar tərəfindən hazırlanmış maarifləndirici materiallar paylanılıb.