Suçiçəyi xəstəliyi çox tez-tez görünən ağır əlamətlərə yol açmayan, virus mənşəli yolxucu xəstəlikdir. Bu xəstəliyi törədən virus "Varicella-zoster" virusudur. Bu infeksiya virusu aldıqdan sonra 14 gün müddətində özünü biruzə verir.

Aztibb.az xəbər verir ki, xəstəliyin əlamətləri bədəndə əmələ gələn qabarıq, qırmızı, içi maye dolu səpkilərdir. Səpgilər qaşınarsa həm iz qala, həm də yeni bakteryalar yarana bilər.

Suçiçəyi xəstəliyi yaşlılarda uşaqlara görə daha ağır keçir. Böyük insanda güclü əzələ ağrıları, zəiflik, titrətmə, davamlı qızdırma, ağırlaşmalar- meningit, miozit, böyrək, ürək zədələnmələri ola bilər. Daha yaşlı və xroniki xəstəliyi olanlar suçiçəçiyini çox ağır keçirir.

Qaşıntısı yüngül olan xəstələr losyon müalicəsi, daha ağır olanlar isə həblərlə müalicə edilir. Bunun üçün immunitet sistemini normal vəziyyətdə saxlamaq lazımdır. Xəstəlikdən qorunmaq üçün hərşeydən əvvəl suçiçəyi keçirən xəstələrlə təmas edilməməlidir və izolyasiya olunmalıdır.

Xəstələrin müalicəsi evdə, ağırlaşmalar olduqda isə xəstəxanada aparılır. Ev şəraitində xəstələrə vitaminlər, xüsusən C vitamini, antihistamin preparatlar verilir, dəri səthində əmələ gələn suluqların tez quruması üçün brilyant yaşılının (zelyonka) 1 faizli spirt məhlulundan istifadə edilir.

Xəstənin alt paltarlarını hər gün, yataq dəstlərini isə 2 gündən bir dəyişmək lazımdır. Dırnaqları qısa kəsmək, əlləri tez-tez yumaqla virusun çoxalmasının qarşısını almaq olar. Hər qida qəbulundan sonra ağız boşluğunu yaxşıca qarqara etmək, yataq otağının havasını tez-tez dəyişmək vacibdir.