Azərbaycan Respublikası Elm və Təhsil Nazirliyi Genetik Ehtiyatlar İnstitutunun (GEİ) Fizioloji genetika şöbəsinin müdiri, biologiya elmləri doktoru, professor Ramiz Əliyevin 85 yaşı tamam olur.
Bu münasibətilə Aztibb.az səhiyyə xəbər portalı adından Ramiz Əliyevi təbrik edir, ona möhkəm can sağlığı, fəaliyyətində uğurlar arzulayırıq.
Qeyd edək ki, alimin əsas fəaliyyət istiqamətləri bitkilərin stres amillərə davamlılığı, heterozis hadisəsi və poliplodiya kimi elmi-nəzəri problemlərin molekulyar-genetik əsaslarının öyrənilməsinə həsr olunub. Onun rəhbərliyi ilə heterozis buğda hibridlərinin somatik hüceyrələrində DNT-nin miqdarının artma faktı ilk dəfə olaraq aşkar edilib, bu nəticələr ixtira kimi qəbul olunub və müəlliflik şəhadətnaməsi alıb. R.Əliyevin tədqiqatları ilə müəyyən edilib ki, bitkilərin stres amillərə davamlılığı hüceyrə genetik sistemlərinin yenidən qurulması və bunun nəticəsində bəzi genlərin ekspresiyasının sürətlənməsi hesabına baş verir.
Professor Ramiz Əliyev ömrünün 60 ilini GEİ-də elmi fəaliyyətlə məşğul olub, instututun elmi potensialının formalaşmasında özünəməxsus xidmətləri ilə seçilib.