Mingəçevir Şəhər Mərkəzi Xəstəxanasında ulu öndər Heydər Əliyevin vəfatının 19-cu ildönümü münasibətilə tədbir keçirilib.

 

Xəstəxanadan Aztibb.az-a bildirilib ki, əvvəlcə tədbir iştirakçıları ümummilli lider Heydər Əliyevin və ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin xatirəsini bir dəqiqəlik sükutla yad ediblər.

 

Anım mərasimində Mingəçevir Şəhər Mərkəzi Xəstəxanasının baş həkimi Ülfət Qurbanov çıxış edərək dahi şəxsiyyət Heydər Əliyevin Azərbaycanın müstəqilliyinin möhkəmlənməsinə, ordu quruculuğuna xidmət edən şərəfli ömür yolundan, həyat və siyasi fəaliyyətindən ətraflı şəkildə bəhs edib. Bildirib ki, məhz Heydər Əliyevin əsasını qoyduğu və Müzəffər Ali Baş Komandan İlham Əliyevin uğurla davam etdirdiyi uzaqgörən siyasət nəticəsində  44 günlük Vətən müharibəsində Azərbaycanın ərazi bötövlüyü bərpa edildi.

 

Daha sonra direktorun İnzibati işlər üzrə müavini Fuad Məmmədov və Mingəçevir şəhərinin fəal qadınlarından olan, həkim Nurcamal Məmmədova ulu öndər Heydər Əliyevin Azərbaycanın inkişafı naminə uzaqgörən, müdrik xarici və daxili siyasət həyata keçirdiyini bildiriblər, ölkəmizin tərəqqisinə və xalqımızın rifahına hesablanmış genişmiqyaslı və ardıcıl islahatların bu gün öz real bəhrəsini verməkdə olduğunu diqqətə çatdırıblar.

 

 

Bildirilib ki, Heydər Əliyevin həyat yolu yüksək insani-əxlaqi keyfiyyətləri özündə təcəssüm etdirən nümunəvi məktəbdir. Onun ölkəmizə rəhbərlik etdiyi illər tariximizə intibah, milli tərəqqi, milli oyanış, nəhayət, müstəqil dövlət quruculuğu dövrü kimi daxil olub. Bu gün Heydər Əliyev siyasətini uğurla davam etdirən Azərbaycan Respublikasının Prezidenti, Ali Baş Komandan cənab İlham Əliyevin və Birinci vitse-prezident Mehriban xanım Əliyevanın rəhbərliyi ilə Azərbaycanın istər daxili, istərsə də xarici siyasətdə əldə etdiyi hər bir uğur Ümummilli Lider zəkasının təcəssümü, onun əmanət qoyub getdiyi ideyaların təntənəsidir.