"Göyçay Rayon Mərkəzi Xəstəxanası" PHŞ-də 8 Noyabr - Zəfər Günü münasibəti ilə "Zəfərə gedən yol" adlı tədbir keçirilib.

Tədbirdə Göyçay Rayon İcra Hakimiyyətinin Humanitar məsələlər üzrə müavini Zivər Zeynalova, Şəhid Ailələrinə Qayğı Cəmiyyətinin sədri Eldəniz Rüstəmov, şəhid ailələri, Vətən müharibəsi iştirakçıları və veteranları, eləcə də xəstəxananın kollektivi iştirak ediblər.

Əvvəlcə Azərbaycanın ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib.

Göyçay Rayon Mərkəzi Xəstəxanasının direktoru Yaşar Əhmədov çıxış edərək 44 günlük Vətən müharibəsində qazanılan qələbənin Azərbaycanın müstəqillik və qəhrəmanlıq tarixinin ən şanlı səhifələrindən biri olduğunu bildirib. Qeyd edib ki, ölkəmizdə şəhid ailələrinə, müharibə veteranlarına və qazilərə yüksək diqqət və qayğı göstərilir.

Yaşar Əhmədov şəhid ailələrinin və Vətən müharibəsi veteranlarının ailələrinin bir neçəsinin xəstəxanada işlə təmin olunduğunu diqqətə çatdırıb.

Sonra şəhid övladı, Vətən müharibəsi iştirakçısı olmuş, hazırda Şəhid Ailələrinə Qayğı Cəmiyyətinin sədri olan Eldəniz Rüstəmov çıxış edib. O, Zəfərə gedən yolun ümummilli lider Heydər Əliyevin uzaqgörən siyasəti, onun layiqli davamçısı Müzəffər Ali Baş Komandan İlham Əliyevin qətiyyətli rəhbərliyi, rəşadətli Azərbaycan Ordusunun yenilməz gücü və xalqımızın sarsılmaz birliyindən keçdiyini qeyd edib.

Tədbirdə Eldəniz Rüstəmov Göyçay Rayon Mərkəzi Xəstəxanasının Fəxri fərmanı ilə təltif olunub.

Həmçinin xəstəxanada çalışan şəhid ailə üzvlərinə və qazilərə müxtəlif hədiyyələr təqdim edilib.