Koronavirus pandemiyası iqtisadiyyatın bir çox istiqamətlərinə ciddi zərər vurmaqla yanaşı, bir sıra sahələrin də önə çıxmasına səbəb oldu.

Bunu Milli Məclisin deputatı Vüqar Bayramov deyib.

V.Bayramov bildirib ki, pandemiya dövründə avtomatlaşdırmaya marağın artması və bu sahələrdə irəliləyiş müşahidə olunur:

“Pandemiyanın davam edən aylarında, o cümlədən post-pandemiya dövründə xüsusən də avtomatlaşdırmaya önəm veriləcək. Bu isə pandemiya dövründə onlayn menecmentin daha çox inkişaf etdirilməsi məqsədini daşıyır”.

Deputatın fikrincə, pandemiya xüsusən ərzaq məhsullarının istehsalında qablaşdırmanın önə çıxmasına səbəb oldu: “Əvvəlki dövrlərdə açıq şəkildə satılan bir sıra ərzaq məhsulları artıq qablaşdırıldığından guman olunur ki, növbəti dövrlərdə də həm qablaşdırma, həm də qablaşdırma ilə bağlı dizayn sahəsinin inkişafı müşahidə olunacaq”.

V.Bayramov əlavə edib ki, onlayn xidmətlər də pandemiya dövründə önə çıxır. Bu sahə üzrə inkişaf davam edəcək:

“Onlayn təhsil, hətta internet vasitəsilə fərdi şagird və tələbə hazırlığı məsələsi önə çıxdı. Eyni zamanda bir sıra sektorlarda, xüsusən dərman peraparatlarının istehsalında bəzi məhsullara tələbatın artması müşahidə olunur və həmin məhsulların, o cümlədən strateji ərzaq məhsullarının və emal edilmiş, qablaşdırılmış məhsulların istehsalının da genişlənməsi müşahidə edilməkdədir”.