Aztibb.az xəbər verir ki, tədbirin keçirilməsində məqsəd maraqlı tərəfləri bir araya toplayaraq sözügedən mövzu ətrafında müzakirələr aparmaq və əhali arasında maarifləndirmənin səviyyəsini artırmaq üçün səmərəli həll yollarını müəyyənləşdirmək olub.

 

Tədbirdə ÜST, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, Ədliyyə Nazirliyi, Kənd Təsərrüfatı Nazirliyi, Azərbaycan Qida Təhlükəsiziliyi Agentliyi, BMT-nin Ərzaq və Kənd Təsərrüfatı Təşkilatının (FAO) məsul əməkdaşları iştirak ediblər

 

"Dəyirmi masa"da antimikrob preparatlara qarşı davamlılıqla mübarizədə insan, heyvan və ətraf mühiti ehtiva edən vahid sağlamlıq yanaşmasına dair müzakirələr aparılıb.

 

ÜST-ün Azərbaycandakı nümayəndəsi, Dr. Hande Harmancı açılış nitqi ilə çıxış edərək Ümumdünya Antimikrob Preparatlardan Düzgün İstifadəyə dair Maarifləndirmə Həftəsinin keçirilməsinin əhəmiyyətini vurğulayıb.

 

Daha sonra ÜST-ün Avropa üzrə regional ofisinin Antimikrob preparatlara qarşı davamlılığa nəzarət üzrə proqram rəhbəri, Dr. Danilo Lo Fo Vonq və FAO-nun Avropa və Mərkəzi Asiya regionu üzrə ofisinin heyvan sağlamlığı üzrə aparıcı mütəxəssisi Eran Raizman  antibiotiklərin düzgün istifadəsi və vahid sağlamlığın əhəmiyyəti ilə bağlı təqdimatlarla çıxış ediblər.

 

Qeyd edək ki, antibiotiklərə qarşı davamlılıq üzrə milli fəaliyyət planı üzərində iş başlasa da, pandemiya səbəbindən təxirə salınıb. COVID-19 dövründə antibiotiklərin istifadəsinin artdığı müşahidə olunur. Bu səbəbdən müxtəlif qurumları bir araya gətirərək plan üzərində işi yenidən başlamaq və yekunlaşdırmaq böyük əhəmiyyət daşıyır.