Oksford Universitetinin yeni araşdırması genetik faktorların COVID-19-a yoluxma və ölüm riskinə birbaşa təsir etdiyini ortaya qoyub.

Araşdırma ağciyər membranındakı hüceyrələrin COVID-19 infeksiyasına təsirini dəyişdirən bir genin olduğunu müəyyən edib. Başqa sözlə, araşdırmaya görə, etnik mənsubiyyət koronavirusun insanda vurduğu ziyana birbaşa təsir edir.

Aztibb.az xəbər verir ki, İngiltərənin “The Guardian” qəzetindəki xəbərə görə, pandemiyanın ikinci dalğasında Pakistan əsilli insanların COVID-19-dan ölmə ehtimalı Avropa mənşəlilərə nisbətən iki dəfə çox idi. Banqladeş əsilli olanlar üçün isə risk üç ilə dörd dəfə arasında olub.

Belə görünür ki, bəzi ölkələrin COVID-19 prosesini digərlərinə nisbətən daha ağır keçirmələrinin səbəbi genetik ola bilər.

Mütəxəssislər aşağı riskli genetik variantı daşıyan insanlarda hüceyrələrin virusa qarşı müdafiəsinin daha sürətli olduğunu, yüksək riskli genin isə vəziyyətin əksinə olduğunu bildiriblər. Eyn zamanda da yüksək riskli genin müdafiə mexanizmini daha da yavaşlatdığı, tənəffüs çatışmazlığı və ölüm riskini iki qat artırdığını qeyd olunub.

Oksford Universitetinin araşdırması yüksək riskli genin Cənubi Asiya irsinin təxminən 60%-i, Avropa mənşəlilərin 15%-i və Afrika və ya Karib dənizi irsinin yalnız 2%-i tərəfindən daşındığını müəyyən edib.

Tədqiqat nəticələri hələ təsdiqlənməsə də, peyvəndin paylanması və s. bu mövzularda bəşəriyyət üçün vacib addımların atılmasına təkan verəcək.