Aztibb.az xəbər verir ki, tanınmış həkim-reanimatoloq Şahin Məmmədov bu barədə məlumat paylaşıb.

 

Həkimin sözlərinə görə, immun sistemin gücünü artırmaq heç bir dərmanla mümkün deyil. Bu, ümumiyyətlə mümkün deyil. Üstəlik biz bilmirik immun sistemin güclü, yoxsa zəif olması COVID-19 zamanı işimizə yarayır ya yox: "Leykosit sayı artsa, fayda verəcəkmi? Xatırladım ki, xəstələrin pisləşməsinin bir səbəbi də sitokin fırtınasıdır. Bu halda immun sistem törədiciyə qarşı həddən artıq reaksiya verərək ağciyər toxumasını özü zədələyir, xəstə daha da ağırlaşır. Sitokin fırtınasının qarşısını almaq üçün həkimlər hətta məcburən immun sistemi zəiflədən bahalı tocilizumab (aktemra) yazırlar".

 

Ş.Məmmədov əlavə edib ki, immun sistemi zəif olan xəstələrdə sitokin fırtınası olmur deyə bəzən paradoksal olaraq yüngül keçirirlər. Belə halları dəfələrlə görürük. Onkoloji xəstələrin koronavirusu yüngül keçirməsi halları həddən artıq çoxdur. Həmçinin immun sistemi tam formalaşmamış uşaqların koronavirusu yüngül keçirməsi də bununla izah edilir. Beləliklə, koronavirus müalicəsində xəstənin immun sistem xəstəliyi yoxdursa, müdaxilə etməmək məsləhətdir.