Aztibb.az xəbər verir ki, tanınmış həkim-reanimatoloq Şahin Məmmədovun sözlərinə görə, xəstənin saturasiyası birdən-birə düşürsə, bu COVID-19 infeksiyasının genişlənməsi, iltihabın artması demək deyil, çox güman xırda ağciyər damarlarının tutulmasına görədir.

 

Həkim qeyd edib ki, COVID-19 koaqulopatiya probleminin profilaktikasında aspirin kardio, kardiomaqnil kimi preparatların heç bir rolu yoxdur. Həm yetərsiz qalır, həm də aspirin trombositə qarşıdır. COVID koaqulopatiyasında trombositin "günah"ı yoxdur. Əksinə, trombositləri geriyədönməz olaraq "blok" etdiyi üçün kleksanla birgə istifadə qanaxmalara səbəb olur. COVID reanimasiyasında bu kimi qanaxmalara misal kimi mədə-bağırsaq qanaxmalarını, ağciyər qanaxmalarını, əzələdaxili inyeksiyadan sonra böyük hematomaları göstərmək olar. Nəzərə almaq lazımdır ki, koronavirus özü ağır xəstələrdə sepsis trombositlərini aşağı salır. Trombositopeniya körpücükaltı vena qoyulması, arterial punksiya kimi çox vacib tibbi proseduraların aparılmasını çətinləşdirir, mümkünsüz edir:

 

"Evdə müalicə zamanıl aspirin qəbul etmiş xəstələr reanimasiyaya düşərsə, onun azalmış trombositləri həm də "blok" vəziyyətində olur. Reanimatoloqlar dəfələrlə trombosit kütləsini köçürməyə məcbur qalır. Bildiyiniz kimi trombosit kütləsi həm çox bahalıdır, həm tapılmır, həm də köçürülməsinin bir sıra fəsadları var. Bu fəsadlara transfuziyaya bağlı kəskin ağciyər zədələnməsi, allergik, infeksion ağırlaşmalar və s. aiddir.

 

Əvvəllər tədqiqatlarda kiçik doza aspirinin koronavirus xəstələrində mortalitəni azaltması fikri yaransa da, sonrakı tədqiqatların aparılmasının vacibliyini vurğulamışdılar. Bu ilin iyun ayında aparılmış tədqiqatının nəticəsinə görə, aspirinin COVID xəstələrində mortalitə və morbiditəni azaltmadığı elan edilmişdir. 

 

Ona görə əvvəlcədən ürək probleminə görə kardioloq tərəfindən ömürlük aspirin yazılmış xəstələr istisna olmaqla, koronavirus xəstələrinə aspirin kardio, kardiomaqnil yazmamaq tövsiyə olunur". 

 

Ş.Məmmədov əlavə edib ki, xəstədə tromboz riski yüksəkdirsə, kleksan yazılmalıdır. D dimer çox yüksək olan xəstələrdə isə heparin davamlı infuziyası göstərişdir.