Təbiət bütün xəstəliklərin şəfa qaynağıdır. İmmun sistemimizi güclü tutan və qrip virusu kimi ortaq patalogiyalara qarşı qoruyucu faydası olan hansı bitkilərin gündəlik rasionumuzda olmasını tövsiyə edərdiniz?

Bitkilər insanlıq tarixi boyunca müalicə məqsədilə istifadə edilib. Hazırda bitkilərlə müalicəyə olan maraq bütün dünyada artmaqdadır. Bitkilər eyni zamanda sintetik mənşəli dərmanlar üçün yolgöstərici açardır. Qeyd edim ki, ciddi xəstəliklərə başlıca səbəb olan viral infeksiyalara qarşı hələ tam təsirli dərmanlar yaradılmadığı üçün bu tip xəstəliklərin müalicəsi tibb elmi qarşısında problem olaraq qalır.

Biyan, Çaytikanı, İtburnu, Andız, Kəkotu, Bədrənc, Dəvədabanı, Dazıotu, Kasnı, Exinaseya, Çobanyastığı, Nanə, Qantəpər, Mayasarmaşığı, Boymadərən və s. kimi yabanı bitkilər malyariyada, bronxitdə, pnevmaniyada, bronxial astmada, insanlarda tənəffüs yolları virusunun, vərəmin müalicəsində, kəskin tənəffüs və xroniki tənəffüs xəstəliklərində dərman kimi istifadə olunur, eyni zamanda  immunbərpaedici təsirlidir.

Dünya alimlərinin apardığı tədqiqatlara baxdıqda görürük ki, HIV, HSV, HCV, HBV, VZV, RSV, MV, Dengue virus, Coxsackievirus, Koronavirus, İnfluenzavirusu, Adenovirus, Enterovirus və Rotaviruslara qarşı fəal Filantus cinsi növləri, Biyan (Glycyrrhizaglabra), Androqafis (Andrographis paniculata), Əzvay (Aloe vera), Adaçayı (Salvia officinalis), Klinakantus (Clinacanthus nutans), Bədrənc (Melissa officinalis) və digər antiviral təsirli aromatik tərkibli bitki növləri var.

Onu da bildirim ki, bu istiqamətdə AMEA Botanika İnstitutunun Etnobotanika laboratoriyasının, ATU-nın İmmunologiya və mikrobiologiya kafedrası ilə əməkdaşlığı çərçivəsində birgə apardığı tədqiqat işləri beynəlxalq səviyyədə xüsusi maraq doğurub və bununla bağlı xarici jurnallarda məqalələr dərc edilib. Tədqiqatlar zamanı 600 bitki barədə toplanmış məlumatlar qeydə alınaraq, Naxçıvan bölgəsindən 160, Gəncə bölgəsindən 130 bitki nümunəsinin istifadəsinə aid məlumatlar izlənilib. Xalq təbabətində istifadə olunan və əksəriyyəti (70%) yabanı floradan toplanan 240 bitki növünün günümüzün ən ağır xəstəliklərində istifadəsi, o cümlədən immunbərpaedici təsiri müəyyən edilib.

Bunu xüsusi vurğulayım ki, klinik tibb bu məlumatlardan yola çıxaraq yeni dərman preparatlarının istehsalına başlaya bilər.

biologiya elmləri doktoru, professor Səyyarə İbadullayeva

Aztibb.az