Haşimoto getdikcə daha çox yayılmaqda olan xəstəliklərdəndir. Qalxanabənzər vəzin xroniki iltihabi xəstəliyi olan bu xəstəlikdə immunitet sistemi müxtəlif səbəblərdən tiroid bezinə hücum etməyə, onu məhv etməyə və funksiyalarını pozmağa başlayır. Nəticədə tiroid bezi istehsal etməsi lazım olan hormonları (T3 və T4 hormonları) ifraz edə bilmir və xəstəlik ortaya çıxır. Bu həm də immun sisteminin xroniki xəstəliyidir.

Aztibb.az xəbər verir ki, qalxanvari vəzin ən geniş yayılmış xəstəliklərindən biri "otoimmün tiroidit" deyilən Haşimoto xəstəliyi ilk dəfə yapon alimi Akira Haşimoto tərəfindən təsvir edildiyi üçün onun şərəfinə adlandırılıb. Bu xəstəlik zamanı orqanizm özü öz toxumasını tanımır, onu yad bir orqan və yaxud cism kimi qəbul edərək yox etməyə çalışır. 

Haşimoto xəstəliyi texnologiyanın inkişaf etdiyi ölkələrdə geniş yayılıb. Xəstəlik daha çox yodun çoxluğundan yaranır. Xəstə adətən şikayətlənmir. Bəzi xəstələrdə zobun simptomları üzə çıxır. Yodun orqanizmə çox daxil olması antitellərin artmasına, bu da vəzin böyüməsinə səbəb olur.

Ürəkdöyünmə, əsəbilik, titrəmə, pəhriz olduğu halda belə çəkinin azalmaması, dəri quruluğu, saç tökülməsi, yuxululuq, xoruldama, halsızlıq, üzdə şişlik, qəbizlik, aybaşı pozğunluğu, təngnəfəslik xəstəliyin əlamətləridir.

Bu xəstəliyə əvvələr daha çox əlli yaşdan sonra qadınlarda rast gəlinirdi. İndi isə yeniyetmələrdə, hətta körpələrdə də görülür.

Xəstəlik erkən dönəmdə aşkar edilərsə, profilaktik müalicə ilə aradan qaldırmaq mümkündür. Xəstə daim endokrinoloqun nəzarətində olmalıdır. Haşimoto xəstəsi nadir hallarda əməliyyata cəlb edilir.