Uzun müddətdir ki, koronavirusun laboratoriyadan sızdığına dair iddialar müzakirə edilir. Virusun ilk rast gəlindiyi şəxsi tapmaqsa ağılasığmaz idi. Halbuki, tədqiqatçılar “sıfırıncı xəstə” adlandırılan şəxsi müəyyən etdiklərini açıqlayıblar.

Koronavirusa yoluxma zəncirinin itmiş halqası tapıldı

Aztibb.az xəbər verir ki, 2019-cu ildən həyatımıza girən koronavirus son günlərdə yenidən “laboratoriya sızması yoluxmaya səbəb oldu” iddiaları ilə gündəmdədir.

Dünyada 3,5 milyondan çox insanın həyatına son qoyan virusla bağlı İngiltərənin “Mirror” qəzetində yer alan yeni xəbərə görə, elm adamları koronavirusa tutulan ilk şəxs ola biləcək namizədi müəyyənləşdirə biliblər.

Bu şəxsin 61 yaşlı bir Çinli qadın olduğu bildirilib. Həmin şəxsdə xəstəliyin əlamətləri yoluxma halının rəsmi təsdiqlənməsindən bir neçə həftə əvvəl noyabr ayında aşkarlanıb.

Çin isə Dünya Səhiyyə Təşkilatına ən erkən başlanğıc yoluxma hadisəsinin 8 dekabr tarixində baş verdiyi barədə məlumat göndərmişdi.

Xəta səbəbindən deşifrə oldu

İngilis mediasında yer alan xəbərlərə görə, tədqiqatçılar “sıfırıncı xəstə”ni bilmədən buraxılan səhvdən sonra tapa biliblər. Həmin şəxsə aid məlumat Çin tibb jurnalına səhvən göndərilib.

Həmin şəxsin yaşadığı küçə Uhan şəhərində mərkəzi sınaq laboratoriyalarına və 11 milyonluq şəhər əhalisi arasında sürətli yoluxmaya şərait yaradan metro şəbəkəsinə çox yaxındır.

Buna baxmayaraq, sözügedən iddia nə tədqiqat qrupu, nə də Çin rəsmiləri tərəfindən qəbul edilməyib.