Öd daşı müalicəyə çox çətin tabe olan bir xəstəlikdir. Əgər sizdə belə bir xəstəlik varsa, birinci növbədə səbirli olmaq, daşı parçalayan və güclü ödqovucu təsirli bitkilərin qəbulundan çəkinmək lazımdır. Çünki daş böyük olan zaman öd axacağını tuta bilər, bu da dəhşətli ağrılarla nəticələnə bilər.

Aztibb.az xəbər verir ki, bu fikirləri həkim-fitoterapevt Fizuli Hüseynov deyib. O, daşları əritmək üçün resept təqdim edərək  bildirib ki, problemdən xilas olmaq üçün 1 ay boyunca gündə 3 dəfə yeməkdən əvvəl 1 çay qaşığı rafinə olunmamış zeytun yağı içilməli, həmin müddətdə 10-15 ədəd iydə yeyilməli, həmçinin gündə 1 dəfə 1 ədəd ağ turp yeyilməlidir.

Bu müalicəyə başlamazdan əvvəl və sonra nəticəni bilmək üçün daşların ölçüsü USM ilə təyin olunmalıdır. Əgər müalicədən əvvəl öd daşlarının ölçüləri 3 millimetrdən böyük deyilsə, qatırquyruğu dəmləməsi içilə bilər. 2 xörək qaşığı qatırquyruğu bitkisi 3 stəkan suda 10 dəqiqə dəmlənib termosa tökülür, gündə 3 dəfə yeməkdən əvvəl 1 stəkan içilir.

"Mənim ən çox istifadə etdiyim üsullardan biri gün ərzində 1-2 litr yağış suyu və ya distillə olunmuş su içməkdir. Bu zaman öd daşları kiçik hissəciklərə parçalanmır və qum şəklində xaric olur, bu səbəbdən də öd yollarını tutmur. Bu üsul uzun zaman tələb etsə də təhlükəsizdir. Daşın ölçüsündən asılı olaraq distillə olunmuş su 2-3 ay içilir. Bu üsulla öd daşları ilə yanaşı, böyrək daşlarını da əritmək olar", - deyə həkim-fitoterapevt bildirib. 

Həkimin sözlərinə görə, Ud hindi öd daşlarını əritmək üçün mükəmməl bir çarədir, əgər öd daşlarınız USM-də kölgə verən daşlar deyilsə (kölgə verən daşlar ərimir və ya çox az əriyir) gündə 3 dəfə yeməkdən 1 saat əvvəl 1 çay qaşığı ud hindi tozu ağıza atılır, üstündən 1 stəkan su içilir. Müalicə müddəti 2 aydır.