"COVID-19 pandemiyası zamanı uşaq sağlamlığı" mövzusunda onlayn konfrans keçirilib.
az.tibb.az xəbər verir ki, Beynəlxalq Pediatrik Assosiasiyası, Azərbaycan Tibb Universiteti (ATU) və Türkiyə Milli Pediatriya Dərnəyinin təşkilatçılığı ilə baş tutan konfransda pandemiya dövründə aktual olan bir sıra mövzular müzakirə olunub.
ATU-nun Elmi işlər üzrə prorektoru, dosent Rauf Bəylərov dünya üzrə pediatriyanın inkişafında böyük rol oynayan həkimləri bir araya gətirən onlayn konfransın təşkilinin əhəmiyyətindən danışıb. Tədbirin iştirakçılar üçün həm klinik təcrübədə, həm də elmi araşdırmalar baxımından faydalı olacağına əminliyini ifadə edib.
Türkiyə Milli Pediatriya Dərnəyinin baş katibi, professor Enver Hasanoğlu çıxış edərək aktual mövzulara həsr olunan konfransın işinə uğurlar arzulayıb.
ATU-nun Təhsilin Keyfiyyətinin Təminatı və İnnovasiya şöbəsinin müdiri, dosent Nigar Sadiyevanın moderatorluğu ilə davam edən konfransda Terapevtik və pediatrik propedevtika kafedrasının dosenti Rauf Bəylərov "COVID-19 və uşaqlarda böyrək xəstəlikləri", ATU-nun Psixiatriya kafedrasının assistenti, tibb elmləri üzrə fəlsəfə doktoru İkram Rüstəmov "Pandemiya zamanı uşaqların psixi sağlamlığı", ATU-nun Tədris Cərrahiyyə Klinikasının Neonatologiya şöbəsinin müdiri Aygün Rüstəmxanlı "COVID-19-a yoluxmuş analardan doğulmuş yenidoğulmuşların sağlamlığı" mövzularında çıxış ediblər.
