İtaliya və İngiltərədən olan bir qrup alim koronavirusun insanlardan heyvanlara keçməsi ilə bağlı araşdırma aparıb.

Aztibb.az Medportal.ru-ya istinadən xəbər verir ki, araşdırma nəticəsində insanların infeksiyanı ev heyvanlarına ötürə bilməsi və itlərin koronavirusa daha həssas olması faktı təsdiqlənib.

Belə ki, elm adamları İtaliyanın pandemiyanın ən çox yayılan bölgələrində mart-may aylarında apardıqları müntəzəm baytarlıq müayinələri zamanı 915 itdən və 505 pişikdən nümunə götürüblər. Seroloji müayinədə 13 it və 6 pişikdə xüsusi neytrallaşdırıcı antikorlar aşkar edilib.

Araşdırma nəticəsində bütün yoluxmuş ev heyvanlarının bir yaşdan yuxarı olduğu və erkəklərin dişilərə nisbətən daha çox yoluxduğu müəyyən edilib.

Tədqiqat müəllifləri qeyd ediblər ki, it və pişiklərin serokonversiyaya, yəni neytrallaşdırıcı antikor istehsalına qadir olduğunu təsdiqləyiblər. İtlərin ehtimal ediləndən iki dəfə çox antikor istehsal etdiyini nəzərə alsaq, bu, pişiklərə nisbətən infeksiyaya daha həssas olduqlarını göstərə bilər.

London Universitet Kollecinin mikrobioloqu Joanne Santininin sözlərinə görə, virus bəzi heyvanlarda aşkarlanmamış şəkildə yayıla bilər. O, bu barədə kifayət qədər məlumatların olmadığını da bildirib.

Xatırladaq ki, koronavirus bütün dünyada yayılmağa başladıqdan bir müddət sonra, müxtəlif ölkələrdə heyvanların virusa yoluxması ilə bağlı xəbərlər yayılmağa başlamışdı.