Hər zaman ölkə vətəndaşlarının sağlamlıqlarının qayğısına qalan ATU Tədris Terapevtik Klinikası son zamanlar dünyanı cənginə almış COVID-19 pandemiyasının ölkəmizdə yayılması ilə mübarizədə olduqca mühüm rol oynamışdır. Bu mühüm missiyanı layiqincə yerinə yetirən klinikamız daha sonra 44 günlük müqəddəs Vətən müharibəsi dövründə də ölkəmizə yaxından dəstək göstərmiş, ön cəbhədə döyüş zamanı yaralanmış hərbçilərimiz üçün peşəkar kadrları ilə səfərbər olmuşdur.

 

Tədris Terapevtik Klinikasının direktoru, professor Surxay Musayevin rəhbərliyi ilə yüksək ixtisaslı həkimlərimiz və orta tibb personalımız böyük ruh yüksəkliyi göstərərək bu təşəbbüsə qoşulmuş və nəticədə yaralı əsgərlərimiz uğurla müalicə olunub öz sağlamlıqlarına qovuşmuşlar. Hazırda ölkəmizdə COVID-19 xəstələrinin sayı sürətlə artmağa başlamış və bu səbəblə klinikamız yenidən bu mübarizəyə qoşulmuşdur. Prof. Surxay Musayev xalqa müraciət edərək tibbi qaydalara riayət etməyə cağırmışdır:

 

"İnsanlar özlərinin və ətrafdakıların sağlamlığına səhlənkarcasına yanaşmamalı, təhlükəli virusdan qorunmaq üçün məlum qaydalara ciddi əməl etməlidirlər.

 

44 günlük Vətən müharibəsində Azərbaycan xalqının nümayiş etdirdiyi möhtəşəm birlik və səfərbərlik dünyaya bir örnək oldu. Vətəndaşları COVID-19 virusu ilə mübarizədə də birlik olmağa, mövcud karantin tələblərinə ciddi riayət etməyə, zərurət olmadıqda evdən çıxmamağa, qapalı və açıq məkanlarda sosial məsafəyə əməl etməyə çağırıram. Hər kəs daha da məsuliyyətli olsa, şəxsi gigiyena, eləcə də tibbi-profilaktik qaydalara əməl etsə, bu gözlə görünməyən düşmənə də tezliklə qalib gələcəyimizə inanıram".