Koreya Xalq Demokratik Respublikasında ilk koronavirus infeksiyasına yoluxma ehtimalı barədə məlumat verildikdən sonra ölkə lideri Kim Çen In Keson şəhərini bağlamaq və onun rayonlarını bir-birindən təcrid etmək qərarına gəlib.

Aztibb.az xəbər verir ki, bu barədə Koreyanın Mərkəzi Teleqraf Agentliyi məlumat yayıb.

Bildirilir ki, Koreya İşçi Partiyası Mərkəzi Komitəsinin Siyasi Bürosu Kim Çen Inın sədrliyi ilə koronavirus infeksiyası şübhəsinin qeydə alındığı Keson şəhərindəki vəziyyətə baxılması üçün təcili iclas keçirib. Şimali Koreya lideri müvafiq ərazidə fövqəladə vəziyyət rejimi də tətbiq edib. İclasda “milli fövqəladə karantin sistemi”ndən “maksimum fövqəladə vəziyyət sistemi”nə keçmək qərara alınıb.

Qeyd edək ki, virusa yoluxmaqda şübhəli bilinən şəxsin iyulun 19-da Cənubi və Şimali Koreya arasındakı hərbi demarkasiya xəttini qanunsuz keçdiyi deyilir. Cənubi Koreyadan qayıtmış şəxsdə virusa yoluxma halı təsdiqlənərsə, bu, Şimali Koreyada koronavirusa ilk yoluxma halı kimi qeydə alınacaq.