İtaliyada yeni növ koronavirus (COVID-19) əleyhinə peyvəndin insan üzərində sınaqdan keçirilməsinə başlanılıb. Kliniki sınaqlar uğurlu nəticə verərsə, peyvəndin yaz aylarında hazır olacağı gözlənilir.

Tibbi preparat  bazar ertəsi Lazzaro Spallanzani Milli Yoluxucu Xəstəliklər İnstitutunda könüllülər üzərində sınaqdan keçirilib. Bazar ertəsi səhəri peyvənd olunan ilk könüllü 4 saat müşahidə altında olduqdan sonra evə buraxılıb. 

"ReiThere" biotexnologiya şirkəti ilə əməkdaşlıq çərçivəsində hazırlanan peyvənd ilk mərhələdə 90 sağlam könüllü üzərində sınaqdan keçiriləcək. Sözügedən peyvəndin sınaqları 18-55 yaş arasında və 65 yaşdan yuxarı insanlar üzərində aparılacaq. Tədqiqatın 24 həftə davam edəcəyi bildirilir. 

Lazzaro Spallanzani Milli Yoluxucu Xəstəliklər İnstitutunun baş direktoru Françesko Vaianın sözlərinə görə, araşdırma 3 mərhələdə aparılacaq. "İlin sonuna qədər ikinci və üçüncü mərhələ üzrə təcrübələrin tamamlanacağına ümid edirik. İtaliyadakı peyvənd sınaqlarının müsbət nəticə verəcəyi təqdirdə, onun koronavirusun geniş yayıldığı Cənubi Amerika ölkəsində istifadəsinə başlanılacaq", - deyə F.Vaia bildirib.

Vaksinin hazırlığına Lazio bölgəsi 5 milyon, Səhiyyə Nazirliyi isə 3 milyon avro vəsait ayırıb.