Alimlər uzun illərdir xolesterini qandan təmizləmək üçün istifadə olunan aferez cihazının mikroplastik və PFAS adlanan "əbədi kimyəvi maddələr"in də bir hissəsini qandan çıxara biləcəyini müəyyən ediblər.

Aztibb.az "Brain Health" jurnalında dərc olunan tədqiqata istinadən yazır ki, PFAS maddələri insan orqanizmində illərlə qala bilir və demək olar ki, hər kəsin qanında rast gəlinir. Mikroplastik hissəciklər isə qida, su və hava vasitəsilə orqanizmə daxil olur və qan, ağciyər, plasenta, hətta beyində belə aşkar edilib.

Tədqiqat zamanı 34 pasiyentdə aferez prosedurundan sonra bəzi PFAS maddələrinin miqdarının 25–75 faiz azaldığı müşahidə olunub. Kiçik qrup üzərində aparılan analizlərdə mikroplastik hissəciklərin də azaldığı görülüb.

Bununla belə, alimlər bildirirlər ki, bu nəticələr hələ ilkin mərhələdədir. Prosedurun orqanizmdə uzunmüddətli təsiri və toxumalarda toplanmış çirkləndiriciləri də azaldıb-azaltmadığı hələ məlum deyil.

Tədqiqat müəlliflərinin fikrincə, ən vacib məsələ mikroplastik və PFAS-a məruz qalmanın qarşısını almaqdır. Çünki sonradan onları orqanizmdən çıxarmaq həm çətin, həm də bahalı prosesdir.