Rusiyada fəaliyyət göstərən azərbaycanlı akademik  Məmmədbağır Cavad oğlu Əliyev “Şərəf” ordeni ilə təltif edilib.

Aztibb.az əbər verir ki, Prezident İlham Əliyev bununla bağlı Sərəncam imzalayıb.

Sərəncamla M.Əliyev Azərbaycanla Rusiya arasında əlaqələrin inkişafında böyük xidmətlərinə və uzunmüddətli səmərəli ictimai fəaliyyətinə görə bu mükafata layiq görülüb.

Qeyd edək ki, Məmmədbağır Cavad oğlu Əliyev 1955-ci ildə Tacikistanın Kurqan-Tübə şəhərində doğulub. 1979-cu ildə Azərbaycan Dövlət Tibb İnstitutunu bitirib.

1979-1991-ci illərdə xəstəxana və onkoloji mərkəzlərdə həkim işləyib. 1992-ci ildə Rusiya TEA-nın Onkoloji Mərkəzində doktorluq müdafiə edərək, burada mütəxəssis kimi fəaliyyətə başlayıb.

Elmi tədqiqatları hərəkət dayaq aparatında radikal müalicə aparılmış xəstələrdə sonrakı reabilitasiya ilə bağlıdır. 2000-ci ildə dövlət mükafatına layiq görülüb.

2011-ci ildə Azərbaycan Respublikasının Prezidenti İlham Əliyev Məmmədbağır Cavad oğlu Əliyevin “Dostluq” ordeni ilə təltif edilməsi haqqında sərəncam imzalayıb.

O, 150-dən artıq elmi işin, iki monoqrafiyanın, bir sıra səmərələşdirici təkliflərin müəllifidir.