Endometrioz uşaqlığın daxili səthini örtən toxumanın uşaqlıqdan kənara yayılması ilə xarakterizə olunan ginekoloji xəstəlikdir.

Aztibb.az xəbər verir ki, mama-ginekoloq Firuzə Cəfərzadənin sözlərinə görə, bu xəstəliyə ən çox uşaqlıq bağlarında rast gəlinir. Digər yayılma sahələri arasında uşaqlığın cismi, borular və yumurtalıqlar da var.

Endometrioid toxuma yerləşdiyi yerdən asılı olmayaraq hormonlara həssasdır və menstruasiya zamanı qanayır. Qarın boşluğunda baş verən bu qanaxmalar zamanla iltihaba və yapışmalara səbəb ola bilər. Xəstəlik yumurtalıqlara yayıldıqda isə endometrioid kista – endometrioma yaranır.

Xəstəliyin əsas əlamətləri aşağıdakılardır:

- Aybaşıdan əvvəl və sonra ağrılar
- Cinsi əlaqə zamanı və ya sonrasında ağrı
- Şiddətli və nizamsız menstruasiya
- Sonsuzluq riski

Bundan əlavə, bəzi hallarda yorğunluq, həzm problemləri (ishal, qəbzlik) və menstruasiya zamanı bağırsaq hərəkətlərinin kəskinləşməsi kimi əlamətlər də müşahidə oluna bilər. Lakin bəzi qadınlarda endometrioz simptomsuz keçə bilər.

Statistikaya görə, endometriozu olan qadınların 50%-i uşaq sahibi olmaq üçün tibbi müdaxiləyə ehtiyac duyur. Sonsuzluq səbəbi ilə həkimə müraciət edən qadınların 25%-də endometrioz diaqnozu qoyulur.

Həkimlər qadınlara mütəmadi ginekoloji müayinələrdən keçməyi və sağlamlıq problemlərini vaxtında araşdırmağı tövsiyə edirlər.