Ohayo Dövlət Universitetinin nevroloqları sinir liflərini bərpa edə bilən insan ağ qan hüceyrəsinin yeni növünü kəşf ediblər.

Aztibb.az xəbər verir ki, “Nature Immunology” jurnalında dərc edilən bu araşdırmanın nəticələri iflic üçün yeni müalicə üsullarının hazırlanmasına kömək edə bilər.

Normal şəraitdə zədələnmiş sinir hüceyrələri bərpa olunmur, nəticədə geri dönməz nevroloji zədələnmə baş verir. Bununla belə, alimlər sümük iliyi hüceyrələrini müəyyən molekullarla stimullaşdıra və onları zədələnmiş sinir hüceyrələrinin sağ qalmasına və bərpasına kömək edən regenerativ hüceyrələrə çevirə bildilər.

Komanda səkkiz müxtəlif insan donorundan sümük iliyi hüceyrələri alıb. Bütün nümunələr sinir hüceyrələrinin bərpasını uğurla inkişaf etdirib, stres altında sağ qalma müddəti üç dəfə artıb, degenerativ xəstəliklərin inkişafını yavaşlatmaq və ya qarşısını almaq, habelə zədələrin təsirlərini müalicə etmək imkanını əldə edilib.

Tədqiqatçılar həmçinin qeyd ediblər ki, xəstələrin öz hüceyrələrindən təhlükəsiz və effektiv müalicələr hazırlamaq üçün istifadə oluna bilər. Hüceyrələrin böyüməsi və çatdırılmasının ən təsirli üsullarını tapmaq üçün laboratoriya təcrübələrindən sonra alimlər klinik sınaqlara başlamağı planlaşdırırlar.

Onurğa beyni, görmə siniri və ya beynin zədələnməsi nəticəsində yaranan sinir zədələri, həmçinin amiotrofik yanal skleroz, Alzheimer xəstəliyi və dağınıq skleroz kimi degenerativ nevroloji xəstəliklər hələ də geri dönməz hesab olunur.