Artıq bu il donuz orqanlarının meymunun bədəninə köçürülməsi planlaşdırılır. Bu, insanlara transplantasiya arasında ara addım olacaq.

Aztibb.az “Involta media” nəşrinə istinadən xəbər verir ki, Meiji Universitetinin nəzdində araşdırmalar aparan Yaponiyanın PorMedTec şirkəti Yaponiyada genetik modifikasiya sayəsində ilk donuz balasının dünyaya gəldiyini açıqlayıb. Və bu donuzun orqanları gələcəkdə insan transplantasiyası üçün istifadə edilə bilər.

Ancaq əvvəlcə ara mərhələni keçirmək, bu donuzun orqanlarını meymuna köçürmək lazımdır.

PorMedTec direktoru Hiroşi Naqaşima NHK-ya bildirib ki, elm adamları indi Yaponiyada ksenotransplantasiyanın klinik istifadəsi ilə bağlı müzakirələri irəli aparmağa ümid edirlər.

"Biz etika ilə bağlı məsələləri müzakirə etməyə davam edərkən, təhlükəsizliyimizə əsas diqqət yetirməklə tədqiqatlarımızı davam etdirəcəyik”, - deyə şirkətin rəsmisi bildirib.

Xatırladaq ki, ötən ilin payızında ABŞ-da 58 yaşlı kişiyə geni dəyişdirilmiş donuzdan dünyada ikinci ürək transplantasiyası həyata keçirilib. O, altı həftə yaşadı və sonra öldü.

İlk transplantasiya 2022-ci ilin yanvarında həyata keçirilib. 57 yaşlı kişiyə ürək transplantasiyası aparılsa da, mart ayında dünyasını dəyişib. Sonradan məlum oldu ki, ölüm sitomeqalovirusdandır.