Naxçıvan Muxtar Respublikası Səhiyyə Nazirliyinin və Azərbaycan Əczaçılar Klubunun təşkilatçılığı ilə Ümummilli Lider Heydər Əliyevin 100 illiyinə həsr edilmiş “Tibb və əczaçılıq biznesinin inkişafı” forumu keçirilib.

 

 

Aztibb.az-a Naxçıvan MR Səhiyyə Nazirliyindən verilən xəbərə görə, foruma tibb və əczaçılıq sektorunun mütəxəssisləri dəvət edilib.

 

Tədbirdən əvvəl qonaqlar Ümummilli Liderin Naxçıvan şəhərinin mərkəzindəki abidəsinin önünə gül dəstələri düzüb və Heydər Əliyev muzeyini ziyarət ediblər.

 

Forum Naxçıvan Mərkəzi Xəstəxanasının akt zalında öz işinə başlayıb.

 

Naxçıvan Muxtar Respublikası Səhiyyə nazirinin birinci müavini, nazir vəzifələrini icra edən Samiq Sadıxov forum iştirakçılarını salamlayaraq, Naxçıvanda səhiyyə sahəsində aparılan islahatlar, gələcək layihələr haqqında məlumat verib. Bildirib ki, Naxçıvanda sahibkarlığın inkişafı üçün yaradılan imkanlardan tibb və əczaçılıq sahəsində çalışan iş adamlarının da faydalanması Naxçıvan səhiyyəsinin inkişafına bilavasitə təsir edəcəkdir.

 

Daha sonra Naxçıvan Muxtar Respublikası İqtisadiyyat naziri Tapdıq Əliyev, Naxçıvan Muxtar Respublikası Dövlət Vergi Xidmətinin rəisi Abbas İsmayılov, Əczaçılar İctimai Birliyinin sədri Şövqi Bünyatov və Özəl Tibb Müəssisələri Assosiasiyası İctimai Birliyinin sədri Günel Əliyeva çıxış edərək Naxçıvanda ilk dəfə keçirilən forumun respublikamızda əczaçılıq sektorunun gələcək inkişafı üçün yeni yollar açağına əminliklərini ifadə ediblər.

 

Forum “Səhiyyədə özəl sektorun inkişafı”, “Dərman təminatının muasir idarə edilməsi” mövzularında panellərlə işini davam etdirib.

 

İki ardıcıl paneldə moderatorların rəhbərliyi ilə mövzularla baĝlı ətraflı müzakirələr aparılıb.