Türk həkimlər Bosniya və Herseqovinanın paytaxtı Sarayevoda "Ümumi reanimasiya təhsili və orqan bağışlanması" adlı proqramda Bosniya və Herseqovinadan olan həmkarları ilə təcrübələrini bölüşüblər.

Aztibb.az “Medimagazin” portalına istinadən xəbər verir ki, həkimlər Balkan ölkələrində orqan bağışlanması və transplantasiyası ilə bağlı hüquqi infrastrukturun inkişaf etdirilməsi lazım olduğuna diqqət çəkərək, cəmiyyətdə orqan bağışlanması ilə bağlı maarifləndirmə işinin vacibliyini vurğulayıblar.

Cərrahpaşa Tibb Fakültəsi Reanimasiya kafedrasının müdiri Dr. Oktay Demirkıran iki günlük kurs proqramının təşkil edildiyini, təcrübə və nəzəri biliklərin onlarla paylaşıldığını bildirib.

Rəylərin çox müsbət olduğunu deyən həkim, Bosniya və Herseqovina Federasiyasının Səhiyyə Nazirliyi ilə əməkdaşlığı davam etdirəcəklərini söyləyib.

Bundan əvvəl isə Qərbi Afrikada ilk orqan transplantasiyası Seneqalın paytaxtı Dakarda türk həkimlərlə birgə həyata keçirilib.

Türkiyə son üç ildə canlı donorlardan böyrək və qaraciyər transplantasiyası üzrə dünya lideridir.