Kimyəvi maddələr burun tıxanıqlığı, burun axması, göz və ya dəri qaşınması kimi allergiya əlamətlərinə səbəb olur. Bəzi insanlar üçün eyni reaksiya ağciyərlərə və tənəffüs yollarına da təsir edərək astma simptomlarına səbəb olur. Ona görə də uşaqlar üçün yastıq və yorğan seçərkən diqqətli olmaq lazımdır.

Aztibb.az “T24” internet qəzetinə istinadən xəbər verir ki, Prof. Dr. Hikmət Tekin Nacaroğlu, ev tozu gənələrinə yun yataq dəstlərində və yorğanlarda tez-tez rast gəlindiyini və allergik xəstəliklərə səbəb olan ən çox yayılmış allergen olduğunu bildirib:

“Allergiyası olan uşaqlar üçün düzgün yataq dəstinin seçilməsi, alergenlərin yaratdığı simptomları azaltmaq və uşağın rahat yuxusunu təmin etmək üçün vacibdir. Gənələr adi gözlə görülməyən mikroskopik canlılardır və ev tozu gənələrinin bədən quruluşları və nəcisləri allergik xüsusiyyətlərə malikdir. Gənələrə daha çox xalçalarda, çarpayılarda, yorğanlarda, yastıqlarda, tüklü və yunlu məmulatlarda, tüklü oyuncaqlarda, parça üzlüklü əşyalarda rast gəlinir”.

Bədənə daxil olan gənə allergenlərinin xüsusilə genetik meylli uşaqlarda allergik xəstəliklərə səbəb olduğuna diqqət çəkən Prof. Dr. Nacaroğlu sözlərinə belə davam edib: “Məsələn, ev tozu gənəsinə qarşı allergiyası olan astma xəstəsi uşaqlarda gənələrə məruz qaldıqda astma simptomları pisləşə bilər. Xüsusilə atopik ekzema kimi dəri allergiyası olan uşaqlarda yanlış yataq dəstinin seçilməsi dəri qaşınması və səpgi kimi allergik dəri şikayətlərini artıra bilər”.

Allergik uşaqlar üçün yastıq və yataq dəstlərinin diqqətlə seçilməsinin vacibliyinə diqqət çəkən Nacaroğlu, bəzi tövsiyələri paylaşıb:

“Alergenə qarşı örtüklər, hipoalergenik dolgu materialları və müntəzəm təmizlik kimi tədbirlər allergiya əlamətlərini azaltmağa kömək edə bilər. Allergik uşaqlar üçün xüsusi olaraq hazırlanmış yataq dəstləri və yorğan örtüklərindən istifadə alergenlərin yataq dəstinə və yorğana daxil olmasının qarşısını ala bilər. Yorğan və yastıq seçərkən, hipoalergenik dolgulu məhsulların seçilməsi allergenlərin yığılmasının qarşısını ala bilər. Bundan əlavə, allergiyası olan uşaqların istifadə etdiyi yorğan və yastıqların asanlıqla təmizlənə və yuyula bilməsi vacibdir.

Allergiyası olan uşaqların otaqlarında allergen yığılmasını azaltmaq üçün yataq otağı mütəmadi olaraq havalandırılmalı, yataq və yorğan dəstləri tez-tez təmizlənərək havalandırılmalıdır. Yorgan örtükləri, yastıq üzləri yuyula bilən olmalıdır və ən azı 60 dərəcə isti suda yuyulmalı və həftədə bir və ya iki dəfə dəyişdirilməlidir.

Allergik uşaqlar üçün yun yorğanlara üstünlük verilməməlidir, çünki tərkibində çoxlu gənə var. Unudulmamalıdır ki, allergiyası olan uşaqlar üçün valideynlər uyğun yataq dəsti seçməli və allergiya əlamətlərini minimuma endirmək üçün uşaq allerqoloqlarından dəstək almalıdırlar.