Qərbi Afrika ölkələrindən biri olan Nigeriyanın Anambra əyalətində poliomielit xəstəliyinə qarşı aparılan kampaniyada 2,3 milyon körpə və uşaq peyvənd edilib.

Aztibb.az “T24” internet qəzetinə istinadən xəbər verir ki, Anambra Əyalətinin Səhiyyə Müvəkkili Afam Obidike etdiyi şərhdə, son bir aydır əyalətdə poliomielit xəstəliyinə qarşı peyvənd kampaniyasına başlanıldığını bildirib.

Peyvənd kampaniyasında 1,5 milyon körpə və 0-5 yaş arası uşağın hədəf alındığını bildirən Obidike, indiyə qədər əyalət üzrə 2,3 milyon körpə və uşağın hədəflənmiş sayının aşıldığını qeyd edib. O, əyalətdə peyvənd kampaniyasının davam etdiyini ifadə edərək, virusa qarşı toxunulmazlıqlarını gücləndirmək üçün valideynləri uşaqlarına peyvənd etdirməyə çağırıb.

Afrikada uşaq iflici Burundi, Nigeriya, Qambiya, Uqanda, Benin, Burkina Faso, Kamerun, Efiopiya, Mali, Niger, Çad və Sudanda da aşkarlanıb.

Qida, su və təmas yolu ilə keçən poliomielit virusuna qarşı tədbir görülməzsə, bu, tənəffüs yollarında problemlərə, uşaqların ömürlük iflic olmasına və ölümə səbəb ola bilər.