İmmunoloq, Milan Dövlət Universitetinin professoru Mario Kleriçi COVID-19-un ikinci dalğası ilə bağlı proqnozlar verib. O, bildirib ki, ikinci dalğa daha yüngül keçəcək, çünki koronavirus yay aylarında ultrabənövşəyi şüaların təsiri ilə əhəmiyyətli dərəcədə zəifləyəcək.

Aztibb.az meddaily.ru resursuna istinadən xəbər verir ki, bu nəticəyə eksperimentlər aparılaraq gəlinib. Belə ki, yoluxmuş insanın öskürməsi və ya asqırması zamanı yaranan effekti canlandırmaq üçün virus su damcılarının içinə yerləşdirilib. Sonra damcılar müxtəlif diapazonlardan ultrabənövşəyi şüanın təsirinə məruz qalıb.

Məlum olub ki, hətta bir neçə saniyə ərzində kiçik dozalarda ultrabənövşəyi şüanın təsiri virusu tamamilə məhv edir.

Professor qeyd edir: “Hazırda heç kəs payızda nə baş verəcəyini əminliklə deyə bilməz. Mən hesab edirəm ki, ikinci dalğa baş verəcək, lakin o,yazda olduğundan daha yüngül keçəcək”.

Bununla yanaşı, tibb sisteminin virusla mübarizəyə daha hazırlıqlı olması səbəbindən ikinci dalğanın daha yumşaq keçəcəyi gözlənilir.