Son on gün ərzində Gürcüstanda koronavirusa yoluxanların gündəlik artımı sağalanların artımını ötməyə başlayıb.
Aztibb.az sputnik-georgia.ru resursuna istinadən bildirir ki, bu barədə Gürcüstanın Xəstəliklərə Nəzarət və İctimai Sağlamlıq Milli Mərkəzinin rəhbəri Amiran Qamkrelidze brifinqdə məlumat verib.
Onun sözlərinə görə, son həftə ərzində 46 nəfər COVID-19-dan sağalıb, 63 nəfər yoluxub.
“Son bir ay ərzində sağalanların sayı yoluxanların sayından çox olub. Son həftədə isə yoluxanların sayı sağalanların sayından yüksəkdir”, - deyə Qamkrelidze qeyd edib.
O, son həftə ərzində yeni yoluxmaların, 24 halın böyük hissəsinin Qardaban rayonunda (Kvemo Kartli regionu) qeydə alındığını bildirib. Buna baxmayaraq, İdarələrarası Koordinasiya Şurası hələlik rayonda karantinin tətbiqi ilə bağlı qərar qəbul etməyib.
Qamkrelidze epidemiyanın zəifləmədiyini, əksinə, son iki həftə ərzində yoluxma sayının artdığını diqqətə çatdırıb.