Xaçmaz rayonu Maqsudkənd kəndində yeni inşa edilən tibb məntəqəsi kənd sakinlərinin istifadəsinə verilib.

Xaçmaz Rayon Mərkəzi Xəstəxanasından Aztibb.az-a verilən xəbərə görə, Maqsudkənd tibb məntəqəsinın açılışında müəssisənin direktoru Səyyaf Tağıyev, direktorun inzibati məsələlər üzrə müavini Murad Həbibov, xəstəxana əməkdaşları və kənd sakinləri iştirak ediblər.

Yeni inşa edilən tibb məntəqəsi Xaçmaz Rayon Mərkəzi Xəstəxanası tərəfindən lazımi avadanlıqlarla təmin edilib.

Açılışda öncə Dövlət Himni səsləndirilib. Giriş sözü ilə çıxış edən direktor Səyyaf Tağıyev yeni istifadəyə verilən tibb məntəqəsinin kənd sakinlərinə daha yüksək səviyyədə tibbi xidmət göstərəcəyini bildirib.

Tibb məntəqəsinin müdiri Səkinə Musayeva uzun illər Xaçmaz rayonunda tibb sahəsində çalışan işçilərdəndir. O, hər bir şəraiti olan tibb məntəqəsində kənd sakinlərinə daha həvəslə tibbi xidmət göstərəcəyini vurğulayıb.
Yeni tibb məntəqəsinin açılışı kənd sakinlərinin də sevincinə səbəb olub.