Dünya Azərbaycanlı Təbiblərin Simpoziumu (DATS) çərçivəsində xarici ölkələrdən gələn həkimlər Şuşa şəhərinə səfər ediblər.

TƏBİB-dən Aztibb.az-a verilən məlumata görə, simpozium iştirakçıları Şuşa mərkəzi meydanında Üzeyir Hacıbəylinin, Xurşidbanu Natəvanın, Bülbülün büstlərinə baxış keçirib.

Heydər Əliyev ilinə həsr olunan Dünya Azərbaycanlı Təbiblərin Simpoziumuna qatılan həkimlər Şuşada Yuxarı Gövhər Ağa məscidini, Molla Pənah Vaqifin məqbərəsini və Şuşa qalasını ziyarət ediblər. Qonaqlar Cıdır düzünə baş çəkərək illər sonra vətəndə, Şuşada olmağın qüruru ilə yallı gediblər.

Qonaqlar simpoziumun təşkil edilməsində zəhməti keçən hər kəsə təşəkkür edərək proqrama Şuşa səfəri kimi önəmli bir hissənin əlavə olunmasından da məmnunluqlarını dilə gətiriblər.

Qeyd edək ki, ilk dəfə keçirilən Dünyadakı Azərbaycanlı Təbiblərin Simpoziumu 17-22 iyun tarixlərini əhatə edib. Bakı, Sumqayıt, Quba, Lənkərana səfərlər təşkil olunub, xaricdən gələn azərbaycanlı həkimlər TƏBİB-in tabeliyindəki tibb müəssisələrinin fəaliyyəti ilə tanış olublar. İyunun 20-21-də simpoziumun elmi hissəsində 14 paneldə bir-birindən aktual və maraqlı mövzular üzrə təqdimatlar və müzakirələr olub.

Xatırladaq ki, simpoziumda dünyanın 14 ölkəsindən 120-dək azərbaycanlı həkim iştirak edib. 1 500-dək Azərbaycanda çalışan tibb işçisi simpoziumun panellərinə qatılıb.