Lalə Axundovanın sözlərinə görə, allergik rinit asqırma, burun, göz və ağızda qaşınma, burun axması və tutulması, sulu, şişmiş qızarmış gözlər və s. əlamətlərlə özünü göstərir. Qida allergiyasının əlamətləri isə dodaq, dil, üz və boğazda şişkinlik, ağızda qaşınma, dəridə səpkilər, anafilsktik şokdur:

 

"Böcək sancması zamanı allergiya baş verdikdə muşahidə olunan əlamətlər: böcək sancan nahiyyədə şişkinlik, qaşınma və bütün bədəndə səpgi, öskürək, nəfəs daralması, anafilaktik şokdur. Dərman allergiyasi zamanı baş verən əlamətlər isə dəridə səpgilər və qaşınmalar, üzün şişməsi, xırıltı, anafilaktik şokdur".

 

Şöbə müdiri qeyd edib ki, anafilaktik şok allergiyanin ən ağır həyatı təhlükəsi olan reaksiyasıdır. Allergenlə təmasdan sonra ani olaraq ortaya çıxır və huşun itməsi, arterial təzyiqin düşməsi, nəfəs çatışmamazlığı, dəri rənginin dəyişməsi, ürəkbulanma və qusma, nəbzin zəifləməsi, sayıqlama kimi əlamətlərlə özünü göstərir.

 

"Allergiya bir çox uşaqlar üçün həyatın xoşagəlməz bir hissəsidir. Uşaq ilk dəfə bu problem ilə üzləşəndə xəstəliyin gələcəkdə necə inkişaf edəcəyini, hansı simptomların və nə qədər tez-tez baş verəcəyini söyləmək çətindir. Bəzi körpələr bu etapdan uğurla keçir və gələcəkdə onunla qarşılaşmırlar, digərləri isə bu problemlə uzun müddət yaşayırlar. Əsas prosesi öz axarına buraxmamaqdı.Vaxtında allerqoloqa müraciət etmək birinci şərtdir", - deyə Lalə Axundova bildirib.