Miqren ciddi xroniki xəstəlikdir. “Miqren” diaqnozu yalnız həkim tərəfindən müəyyən edilir. Buna baxmayaraq bəzi əlamətlərə görə də insan özündə bu xəstəliyin olmasından şübhələnə bilər. Belə şübhələr yaranan kimi isə tez bir zamanda həkim nevroloqa müraciət etmək lazımdır.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanası Poliklinika şöbəsinin nevroloq həkimi Şəbnəm Məmmədova məlumat verib.

 

Həkim bildirib ki, miqren güclü və uzun sürən baş ağrılarıdır. Ağrı bir göz və onun ətrafından başlayaraq tez bir zamanda əksər hallarda başın bir yarısına, nadir hallarda isə hər iki yarısına yayılır. Ağrı pulsasiya (nəbz vurğuları kimi) xarakterli olur. Ətraflar soyuyaraq avazımış olur. Parlaq işıq, kəskin yüksək səslər ağrını artırır. “Miqren” tutması zamanı tez-tez ürək bulanma və qusma da baş verir. Tutma zamanı bəzi hallarda xəstədə görmənin ikiləşməsi, gözlərinin qarşısında yanıb-sönən işıqların, ziqzaq şəkilli xətlər və ya qığılcımların olması kimi şikayətlər də olur. “Miqren” tutması 4 saatdan 72 saata qədər davam edə bilər. Bəzi insanlarda bu tutmalar ay ərzində 2-3 dəfə, digərlərində isə ildə 1 dəfə baş verir.

 

Ş.Məmmədova qeyd edib ki, miqren tutmaları istənilən yaşda başalaya bilər. Ancaq əksər hallarda onlar, 20-30 yaşlarında başlayaraq 50 yaşından sonra keçib gedir.

 

"Həkimlərin müşahidələrinə görə, miqrendən əziyyət çəkənlər üçün bir sıra ümumi xüsusiyyətlər vardır: streslərə qarşı dözümlülüyün zəif olması, həyəcanlılıq, tez hirslənmək, depresiyalara və əhvalın dəyişməsinə meyillilik", - deyə həkim əlavə edib. 

 

Miqren tutmasını törədən 2ci dərəcəli səbəblər:

 

• Parlaq işıq və ya güclü səs, kəskin qoxular:

• Havanın kəskin şəkildə dəyişməsi, maqnit fırtınası:

• Qadınlarda hormonal dəyişikliklər (hamiləlik, menepoza):

• Yuxunun kifayət qədər olmaması:

• Güclü fiziki və əqli gərginliklər:

• Uzun müddət nəqliyyatda hərəkət etmək, təyyarə ilə uçuş:

• Aclıq:

• Bəzi qida növləri (şokolad, kakao, qoz - fındıq məhsulları, sitrus meyvələri, paxlalı bitkilər, pamidor, kərəviz, pendirlər), alkoqol (xüsusən də qırmızı çaxır, şampan şərabı, pivə), kofein və bəzi dərman pereparatları (məsələn: arterial təzyiqi aşağı salan dərmanlar, hamiləliyin qarşısını alan hormonal kontraseptivlər və s.)

 

Ona görə də, miqrendən əziyyət çəkən insanlar proflaktik məqsədlə, onlarda tutmanın başlamasını törədən faktoru müəyyən etmək üçün çox diqqətli olmalı və hər zaman həmin faktorlardan mümkün qədər uzaq olmalıdırlar. Belə adamlar kifayət qədər yatmalı, istirahət etməli, vaxtlı-vaxtında düzgün qidalanmalıdırlar və qida rasionuna tərkibində maqnezium olan məhsullara üstünlük verməlidirlər. Ümumiyyətlə, onlar tam sağlam həyat tərzi sürməli, bədən tərbiyəsi, üzgüçülük, uzun müddət açıq havada gəzməli və digər bu kimi sağlamlaşdırıcı üsullardan istifadə etməlidirlər.