Rubrikada bu dəfə  "Sumqayıt Tibb Mərkəzi" Publik Hüquqi Şəxsin direktor müavini və Sumqayıt Perinatal Mərkəzin baş həkimi, Əməkdar həkim Təranə Rəcəbli haqqında məlumatları təqdim edirik.

 

Təranə Zakir qızı Rəcəbli 16 mart 1972-ci ildə Sumqayıt şəhərində anadan olub. 1989-1995-ci illərdə N.Nərimanov adına Azərbaycan Dövlət Tibb Universitetinin Pediatriya fakültəsində təhsil alıb. Universiteti bitirdikdən sonra həkim-pediatr ixtisasına yiyələnərək, Sumqayıt şəhər 1 saylı Doğum evində fəaliyyətə başlayıb.

 

O, 1997-2008-ci illərdə 1 saylı Doğum evində şöbə müdiri, 2008-2014-cü illərdə “Real” Tibb Mərkəzində direktor vəzifələrində işləyib. 2014-2016-cı illərdə Respublika Perinatal Mərkəzində baş həkim kimi fəaliyyətini davam etdirib. Hazırda "Sumqayıt Tibb Mərkəzi" Publik Hüquqi Şəxsin direktor müavini və Perinatal Mərkəzin rəhbəridir.

 

27 illik təcrübəyə sahib olan Təranə Rəcəbli ömrünü tibbin ginekologiya sahəsinə həsr edib. Fəaliyyəti dövründə çoxsaylı yerli və beynəlxalq konfransların iştirakçısı olub, müxtəlif qurumlar tərəfindən Fəxri fərman, diplom və medallarla təltif edilib.

 

O, tibbi fəaliyyətlə yanaşı, ictimai fəaliyyətlə də məşğuldur. YAP Sumqayıt şəhər təşkilatının İdarə Heyətinin üzvüdür. 

 

Təranə Rəcəbli ölkə başçısının 20 noyabr 2019-cu il tarixli Sərəncamı ilə "Əməkdar həkim" fəxri adına layiq görülüb.