Gecə növbəsi sağlamlığa necə təsir edir? TƏDQİQAT
17.12.2021 20:52
Yeni bir tədqiqatın nəticələrinə görə, gecə növbəsi beynin və ürəyin bioloji saatlarının harmoniyasını pozaraq ürək xəstəliklərinə səbəb ola bilir.
 
Gcələr işləmək həm adamı yorur, həm də yuxusuzluq problemi yaradır, üstəlik digər xəstəliklərə əsas yaradır.
 
Aztibb.az xəbər verir ki, Kembric Universitetinin molekulyar biologiya mütəxəssisləri ürəyin hər bir hüceyrəsinin bioloji saatının fəaliyyətini, gün ərzində hüceyrələrin kimyəvi balansını dəyişən prosesi araşdırıblar.
 
İnsan bədəni aktiv olanda ürək də çox işləyir, yəni daha sürətlə vurur. Ürəyin necə döyündüyü iki faktorla – beyindən gələn siqnallar və hər bir ürək hüceyrəsindəki natrium və kaliumun səviyyəsi ilə müəyyən edilir.
 
Sağlam insanlarda bu saysız-hesabsız hüceyrə saatları bir-biriləriylə sinxron çalışır. Amma araşdırma göstərir ki, iş qrafikimizin dəyişməsinə beynimiz daha tez, bədən hüceyrələrimizin bioloji saatları isə nisbətən gec uyğunlaşır.
 
Bir neçə gün ərzində beyin ürəyin ənənəvi rejiminə uyğun olmayan siqnallar ötürür. Ona görə də növbəli işlərdə çalışanların orqanizmi sağlamlıq problemlərinə daha həssas ola bilər.
 
Həm gündüz, həm də gecə növbəsində işləmək ürəkdə müxtəlif nasazlıqlar yaranma riskini artırır. Növbəli işin təkcə ürək xəstəliklərinə deyil, həzm və əhval pozuntusuna da səbəb olduğu bilinir. Bundan başqa, yalnız gündüz növbələrində işləyənlərlə müqayisədə hər iki növbədə işləyənlərin xərçəngə tutulma riski daha çoxdur.