Məlum olduğu kimi, dünya tibb elminin yeni məlumatlarının həcmi sürətlə artır və müasir dövrdə həkimlərin fəaliyyətini tibbi qərarların dəstəklənməsi sistemi olmadan təsəvvür etmək mümkün deyil.

Tibbi praktikada yeni klinik protokolların istifadəsi sübutlara əsaslanan tibbin tətbiqinin ən vacib yollarından biridir və  tibbi sübutlara əsaslanan klinik protokollar əsasən təcrübə həkimləri üçün metodik tövsiyələrdir.

Aztibb.az xəbər verir ki, dünyanın tanınmış tibb mütəxəssisləri tərəfindən yaradılan və tibbi sübutlara əsaslanan www.ebmg.az informasiya resursundan Avropa və keçmiş SSRİ-nin 10-dan çox ölkəsinin həkimləri istifadə edirlər. Resursdan azərbaycanlı həkimlər də faydalana bilirlər.

Sübutlara Əsaslanan Tibbi Təlimatlar (Evidence-Based Medicine Guidelines) portalında tibbi protokollarla yanaşı, sübutlara əsaslanan beynəlxalq məlumat bazaları da vardır ki, 4000-dən çox elmi məqalə, 1400 tibbi şəkil və video kolleksiyası, kalkulyator və səs faylları, o cümlədən müxtəlif patologiyalar zamanı ürək və ağciyərdə eşidilən küylərin audioyazılmaları, dermatoloji və göz xəstəliklərinin 1400-dən çox şəkilləri və təsviri istifadəçilərə təqdim olunur.  

EBMG klinik protokollar dövlət səviyyəsində milli səhiyyə nazirlikləri tərəfindən ilkin səhiyyə xidməti müəssisələrində çalışan həkimlər üçün standart olaraq lisenziyalaşdırılıb.