Pambıq bitkisinin faydaları uzun müddətdir öyrənilib və istehlak edilməkdədir. Bu bitki sənayedə, tibbdə, qida rasionu kimi və digər sahələrdə tətbiq edilir.
Geyim sənayəsində emalatın artmasıyla bərabər, pambığın yerini alan sintetik lif materialın toxuculuq sahəsində artımı görülməkdədir. İnsanların böyük hissəsi bu barədə dəqiq məlumata sahib olmadığından, sintetik materialın zərərlərinə çox da fokuslana bilmirlər.
Aztibb.az sintetik lifli paltarların sağlamlığa mənfi təsirləri, zəngin kimyəvi tərkibi olan pambığın sağlamlığa faydaları və pambıq geyimlərin əhəmiyyəti haqqında yazını təqdim edir.
Ümumiyyətlə, sintetik materialın zərərli olması təbii pambıq lifinə olan zərurəti artırır. Bu da imkan yaradır ki, sağlamlıq baxımından pambıq sanəyedə əsas xammal funksiyasını davam etdirsin.
Sintetik liflərin zərərli olmasını qeyd etdik. Bəs sintetik liflər nədən əldə olunur? Bu materialın ilk xammalı təbii qaz və neftdən ayrılmış məhsullardan, daş kömürdən, etiləndən və bunlar kimi mənbələrdən əldə olunur. Bu tip məhlulları mürəkkəb bir prosesin içində emal edərək, yüksək molekulyar maddələr əldə edilir. Əldə edilən yüksək molekulyar maddələrdən alınan məhluldan isə lif hazırlanır.
Mütəxəssislər tövsiyə edir ki, alt paltarları pambıq parçadan olmalıdır. Alt paltarı pambıq parçadan olarsa, dəri ifrazatları yaxşı şəkildə hərəkət edər. Sintetik parçalarda isə ifrazat pis hopur və dəridə qıcıqlanmalar ilə bərabər qaşıntılara səbəb olur.
Hamilə qadınlara isə ümumiyyətlə sintetik parçalı geyimlər məsləhət görülmür, çünki sintetik parça dərinin nəfəs almasına mənfi təsir göstərir və bədənin tərləməsinə mane olur. Bu da orqanizmə birbaşa təsir edən amillərdəndir.
Ümumiyyətlə, pambıq parçadan olan paltarlar insan bədənini sıxmır və bədənə istənilən formada yaxşı oturur. Təbii pambıq parçadan olan geyimlər insan bədəninə ağırlıq yaratmır, yəni bu tip paltarlar yüngül olur. Sintetik parçalarda isə bu nüanslar fərqlidir.
Bunlardan əlavə, paltar bədən çəkisinin 8-10 faizindən çox olmamalıdır, lakin sintetik liflər ağır olur.
Təbii pambıqdan olan geyimlərin boyası gec və ya çətin getdiyi üçün bədənə heç bir mənfi təsir yaratmır. Sintetik parçalı geyimlərdə isə boya asanlıqla çıxır.
Əgər isti havalarda sintetik materialdan olan paltar geyinmisinizsə, tərlədiyiniz zaman paltardan dərinizə bir çox maddə keçə bilər. Hətta, bu tip geyimləri yuduqda və ya üzərinə ətir sıxdıqda, paltarın tərkibindəki maddələr ilə qarışıqlıq yaranır.
Əyninizdəki geyim dar və sintetikdirsə, parça içərisində yer alan zərərli maddələr dəriyə hopa bilər.
Pambıq parça geyimləri bədənə lazımi şüaları yaxşı keçirir. Sintetik parçalar isə ehtiyac duyulan şüanı bədənə keçirmir. Kapron və neylon kimi sintetik materiallar ultrabənövşəyi şüaları 50-70 faiz dəyərində keçirir. Odur ki, günlük geyimlərinizdə çalışın pambıq parçalara önəm verin.
