Alimlər ağcaqanadlara Denqe virusunu yayma qabiliyyətini azaldan bakteriya yoluxduraraq, Denqe qızdırmasının qarşısını ala bildiklərini açıqlayıblar.  

Aztibb.az xəbər verir ki, alimlər bu təcrübəni İndoneziyanın Yoqyakarta şəhərində infeksiyanı yayan ağcaqanadlara qarşı mübarizə məqsədilə aparıblar.  

Təcrübədə virusun yayılma qabiliyyətini azaldan "Wolbachia" adlı bakteriyaya yoluxmuş ağcaqanadlardan istifadə edilib. 5 milyon ağcaqanad yumurtası həmin bakteriyaya yoluxdurulub.  

Tədqiqatın nəticələri “New England Journal of Medicine” jurnalında yayımlanıb.  

Tədqiqatçıların şəhərdə yoluxmuş ağcaqanad populyasiyasını yaratması 9 ay çəkib. Bakteriyalı ağcaqanadlar şəhərin müxtəlif bölgələrinə sərbəst buraxılıb.

Nəticədə qızdırmaya yoluxmada 77%, infeksiya ilə əlaqəli xəstəxanalara yerləşdirilən xəstələrin sayında isə 86% azalma müəyyən edilib.  

Tədqiqatçılar həmçinin bakteriyanın ağcaqanadlara zərər vermədiyini də vurğulayıblar.  

Qeyd edək ki, Denqe qızdırması hər il 400 milyon insana yoluxur. Xəstəliyi yaradan virus insanlara ağcaqanadlar vasitəsilə yoluxur. Bəzi hallarda ölümcül ola bilən xəstəlik yağışlı mövsümdə daha geniş yayılır. İnfeksiyanın sınıq sümük ağrısına bənzər simptomları olduğu üçün “sınıq sümük qızdırması” da adlanır.