Aztibb.az xəbər verir ki, Mehdi Əliyev çıxışında bildirib ki, ağır gedişli kəskin respirator distress sindromlu (ARDS) xəstələrdə mexaniki və baro travmaların nəticəsi olaraq alveolyar hüceyrələrin yırtılması və nekrozu baş verə bilər. Bu, orqanizmin pulmonar və sistemik iltihabi reaksiyasını kəskin artıraraq, xəstələrin ölüm faizini yüksəldir. Artan ölüm faizlərini azaltmaq məqsədi ilə ARDS-li xəstələrə ECMO tətbiq edilməyə başlandı.

 

ECMO tətbiqindən sonra respirator distress sindromlu xəstələrin yaşama şansı 50%-ə qədər artır. ECMO kəskin və geridönən ağciyər və ürək çatışmazlığında əlavə köməkçi vasitə kimi müvəqqəti istifadə olunan kardiopulmonar baypas cihazıdır. Ağır COVID-19 xəstələrinin müalicəsində istifadə olunan ECMO ağciyərlərdəki qazlar mübadiləsini və qan dövranını bədəndən kənarda mexaniki olaraq təmin edən vasitədir.

 

Onun sözlərinə görə, ECMO xəstəliyi müalicə etmir, lakin dəstəkləyici terapiyanı təmin edir. Hipoksemiya və hiperkapniyanı aradan qaldırmaqla ağciyərlərin işini müvvəqəti olaraq öz üzərinə götürür və ağciyərlərə əlavə zədə yetirmədən iş yükünü azaldaraq, qısa zamanda müalicə etməyə şərait yaradır.

 

Qeyd edək ki, 1971-ci ildə Dr. J.D. Hill ilk dəfə kəskin respirator distress sindrom diaqnozlu 24 yaşlı kişi xəstədə ekstrakorporal Bramson membran oksigenatorunu əməliyyatxana xarici istifadə edərək müsbət nəticə əldə etmişdir. 2019-cu ildən Çinin Wuhan şəhərindən epidemya şəklində başlayıb sonra pandemiyaya çevrilən COVID-19 virusunun yaratdığı xəstəlik zamanı xəstələrdə qısa zamanda ARDS inkişaf etdiyi üçün, bu xəstələrin ən ağır formalarına ECMO tətbiq edilməyə başlanıldı.

 

Əgər xəstədə korreksiya olunmayan tənəffüs asidozu, ağciyərlərdə davamlı hava qacağı sindromu varsa, xəstə pron vəziyyətdə, miorelanksant, inhalyasion bronxodilatatorlar alırsa, bu zaman ECMO haqqında düşünmək lazımdır. COVID-19 pandemiyası zamanı aparılan geniş araşdırmalar konvensional terapiyaya cavab verməyən ağır ARDS xəstələrin sağalmasında VV-ECMo-nun faydalı olduğunu təsdiqləmişdir.