Məlum olduğu kimi, müxtəlif ölkələrdə COVID-19 xəstəliyinin yayılma və ölüm göstəricilərində əhəmiyyətli dərəcədə fərqlər müşahidə olunur. Bununla əlaqədar virusların genetik xüsusiyyətlərinin öyrənilməsi elmi-praktiki əhəmiyyət kəsb edir və onun yayılma tezliyinə və ölüm dərəcəsinə təsir edə biləcək amillərin təyin edilməsinə köməklik edir.

Aztibb.az xəbər verir ki, bununla əlaqədar AR Səhiyyə Nazirliyi Ümumdünya Səhiyyə Təşkilatının dəstəyi ilə Azərbaycanda dövr edən virusların genomlarının öyrənilməsini həyata keçirib.

Bugünədək dünyada COVID-19 xəstəliyi törədən virusun 100-ə yaxın genomu müəyyən edilib ki, tədqiqat zamanı Azərbaycanda dövr edən və xəstəliyin nisbətən yüngül kliniki gedişatına səbəb olan iki növü təyin edilib. Onlardan biri Türkiyə, Qazaxıstan, Gürcüstan, Rusiya və s. ölkələrdə rast gələn genom növüdür. Digəri isə Avropada dövr edən genomdur. Bu qrupdan olan genomlar daha çox Birləşmiş Krallıq, İsveçrə və Avstraliyada rast gəlinir.

Bu kimi tədqiqatların nəticələri COVID-19 xəstəliyini törədən virusun təbiətinin və dəyişkənliyinin öyrənilməsində və ona qarşı vaksinin hazırlanmasında istifadə olunur.