Həkim bildirib ki, hazırda insanların həyat tərzi, iş rejimləri onların yuxusuna çox təsir edir. Bəzilərinə adi görünən yuxusuzluq problemi ən ağır xəstəliklərə – şəkərli diabetə, cinsi funksiya pozğunluğuna, astma və xərçəng xəstəliklərinə yol aça bilər. Yuxunun əhəmiyyəti barədə yəqin ki, hamı bilir. İnsan gün ərzində aktiv fəaliyyətdə olduğundan, onun bütün orqanları yüklənmiş olur. Ona görə də, daha az xəstələnmək və güclü immun sisteminə malik olmaq üçün düzgün yuxu rejiminə riayət olunmalıdır.

 

Yuxu zamanı melatonin hormonu çox güclü bir antioksidant və sərbəst radikal təmizləyici rolunu oynayaraq beyini qoruyur, orqanizmdə zərərli xolesterolu azaldır, hüceyrə sistemini yeniləyərək immun sistemini gücləndirir. Bir ildən artıqdır ki, hamımız COVID-19 infeksiyası ilə mübarizə aparırıq. Koronavirus məhz immun sistemi zəif olan insanları yaxalayır və bu xəstəliyi ağır keçirmələrinə səbəb olur. Bütün bunlar ilk baxışdan əhəmiyyət vermədiyimiz məqamlardır ki, sonda çox ağır fəsadları yaşamağımızla nəticələnir.

 

Son zamanlar informasiya texnologiyalarının insanların həyat tərzini kökündən dəyişdiyini söyləyən həkim, hər kəsin internet - sosial şəbəkələr və messencerlərə bağlı olduğunu, bunlardan həddindən çox istifadənin yuxusuzluğun başlıca səbəblərindən olduğunu qeyd edib. Bildirib ki, müəyyən saatlar (saat 23:00-dan 01:00-a qədər) var ki, bu vaxt yatmayanda yuxu qaçır və getdikcə bu, vərdiş halına çevrilir:

 

"Yuxusuzluq insanlarda enerjinin tükənməsi və əmək məhsuldarlığının aşağı düşməsinə gətirib çıxarır. Bir həkim kimi tövsiyə edərdim ki, sağlamlığımız üçün təhlükəli olan yuxusuzluğa yol açmamaqdan ötrü hər gün eyni vaxtda yatmaq, yatmazdan əvvəl buna hazırlaşmaq lazımdır: kitab oxumaq, yoqa ilə məşğul olmaq, meditasiya etmək və s. Bunlardan hər biri insan orqanizmini yuxuya hazırlayan siqnallardır. Həmçinin yatarkən işıqları söndürmək lazımdır. Hamıya məlumdur ki, melatonin hormonu məhz tam qaranlıqda yaranır.

 

Yatmazdan 3-4 saat əvvəl yeməkləri, 1 saat əvvəl isə smartfon, televizor və planşeti unutmaqda fayda var. Yaxşı olar ki, yatmazdan əvvəl 1 saat açıq havada gəzəsiniz. Sağlamlığınızı qorumaq üçün şirin yuxu ilkin şərtlərdən biridir".