Koronavirus pandemiyasının qarşısının alınması məqsədilə ölkəmizdə həyata keçirilən vaksinasiya tədbirləri çərçivəsində Qəbələ rayonunda əhalinin COVID-19 infeksiyasına qarşı peyvənd olunması prosesi davam edir. Əhalinin peyvəndlənməsi Qəbələdə ötən il istifadəyə verilən modul tipli xəstəxana kompleksində həyata keçirilir. Bu günədək 5293 vətəndaş təhlükəli virusa qarşı peyvənd olunub.
Bununla bağlı rayon icra hakimiyyətində yaradılan qərargahdan bildirilib ki, Nazirlər Kabinetinin 2021-ci il 16 yanvar tarixli Sərəncamı ilə təsdiq edilmiş “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq əhalinin peyvəndlənməsi mərhələli şəkildə həyata keçirilir. İlkin mərhələdə rayonun səhiyyə müəssisələrində çalışan tibb işçiləri peyvənd olunublar. Ümumiyyətlə, yaş qrupları üzrə bu günədək 65 yaşdan yuxarı 1314 vətəndaş, 50-65 yaş arasında 3117 vətəndaş, 50 yaşadək isə 862 vətəndaş koronavirusa qarşı peyvənd olunub və proses davam edir.