Nazirlər Kabinetinin 2021-ci il 16 yanvar tarixli Sərəncamı ilə təsdiq edilmiş “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na müvafiq olaraq, ölkəmizin bütün bölgələrində vaksinasiya prosesinin birinci mərhələsinə start verilib.
Qəbələdə əhalinin peyvəndlənməsi ötən il istifadəyə verilən modul tipli xəstəxana kompleksində həyata keçirilir. İlkin mərhələdə rayona 900 doza vaksin gətirilib. Vaksinasiya kampaniyasının ilk günlərində rayonda 450 tibb işçisinə peyvəndin birinci dozası vurulub və proses davam edir.
Masallıda iki gün ərzində COVID-19 infeksiyasına qarşı 313 nəfər peyvənd olunub. Peyvəndin ikinci dozası 21 gündən sonra tətbiq ediləcək.
Xaçmaz rayonunda vaksinasiyanın başlandığı bu günlərdə artıq 100-dən çox tibb işçisinə peyvəndin ilk dozası vurulub. Rayon Mərkəzi Xəstəxanasında yaradılan vaksin otaqlarında TƏBİB-in təlimatlarına uyğun zəruri şərait yaradılıb.
Tərtərə isə ilkin mərhələdə 347 doza vaksin gətirilib. Vaksinasiya kampaniyasının ilk günlərində rayonda 128 tibb işçisinə peyvəndin birinci dozası vurulub və proses davam edir.
Gədəbəydə də vaksinasiyaya başlanılıb. Bu mühüm tədbirlə bağlı rayon mərkəzi xəstəxanasının İnfeksion şöbəsinin binasında təhlükəli virusa qarşı mübarizə məqsədilə xüsusi vaksin otaqları və peyvəndlərin daşınması üçün TƏBİB-in təlimatlarına uyğun zəruri şərait yaradılıb. Hazırda rayonda strategiyaya uyğun olaraq vaksinasiyanın birinci mərhələsində səhiyyə işçiləri peyvənd olunur.
Mingəçevir şəhərində 3 vaksinasiya məntəqəsi və hər birində isə 8 vaksinasiya otağı var. Bütün məntəqələrdə tibb işçiləri vaksinasiyaya cəlb olunub. Gün ərzində 180-200 nəfər peyvəndlənir.
Gəncə, Göygöl, Goranboy və Ağstafada da vaksinasiya prosesinə start verilib. Peyvəndin əks təsiri olmadığını bilən tibb işçiləri ilk olaraq bu aksiyaya özləri könüllü qoşulublar. Vaksin olunmuş vətəndaşlar 30 dəqiqə ərzində gözlənilir və hər hansı bir problem olmazsa, evə göndərilir.
Qeyd edək ki, təhlükəsizliyinə və effektivliyinə görə seçilən “CoronaVac” vaksini ilkin mərhələdə risk qrupuna daxil olan sakinlərə - səhiyyə işçilərinə, yaşı 65-dən yuxarı olan şəxslərə və hüquq-mühafizə orqanları tərəfindən əks-epidemik tədbirlərə cəlb edilmiş heyətə könüllülük əsasında vurulur.
