İmmun dərmanları, stimullaşdırıcıların qeyri-düzgün qəbulu ağır nəticələrə gətirib çıxara bilər.

Bunu Aztibb.az-a müsahibəsində AMEA Botanika İnstitutunun Etnobotanika laboratoriyasının müdiri, biologiya elmləri doktoru, professor Səyyarə İbadullayeva deyib.

Onun sözlərinə görə, profilaktika üçün pereparat qəbuluna ehtiyac yoxdur. İmmunitet həqiqətən zəifləyibsə, o zaman stimullaşdırmaq lazımdır: “İmmunitet ağır xəstəliklərdən sonra aşağı düşür və bu zaman ona stimulyatorlar lazım olur. Qalan vaxtlarda isə sağlam həyat tərzi və vitamin qəbul etmək yetərlidir”.

Səyyarə İbadullayeva bildirib ki, immunoloji müdafiə şərti olaraq 2 kateqoriyada təsnif olunur: anadangəlmə və qazanılmış.

Anadangəlmə yaxud qeyri-spesifik (təbii, qeyri-adaptiv) immun sistemi orqanizmin bioloji aqressiyadan qorunmasının ilkin mərhələsini təşkil edir. Anadangəlmə immun sisteminin komponentləri insan və heyvan anadan doğularkən orqanizmdə hazır şəkildə mövcud olur və onlar tərəfindən antigenə qarşı mübarizə tez bir zamanda, heç bir hazırlığa ehtiyac olmadan baş verir.

Qazanılmış yaxud spesifik immun sistemi müdafiənin sonrakı mərhələsini təşkil edir.

Qazanılmış immun sistemi limfositlər tərəfindən orqanizmin ontonogezində fərdi inkişafı dövründə formalaşır. O anadangəlmə immun sitemindən yüksək spesifikliyə və yaddaşa malik olmasına görə fərqlənir. Bu zaman orqanizmə daxil olmuş hər bir antigenin özünə qarşı xüsusi immunoloji cavab reaksiyaları yaradılır. Antigenlə qarşılaşma immun sisteminin yaddaşında saxlanılır və antigenlə ikinci dəfə qarşılaşma olarsa, ona qarşı daha güclü müdafiə təşkil olnunur.

İnsan qanı əsasında yaradılmış immun preparatları yüksək səviyyədə interferon hazırlanmasına yönəldilib. İnterferon zülalı həm virusların çoxalmasının qarşısını alır, həm də immunostimulyator rolu oynayır. Bu, əyani şəkildə göstərir ki, immun dərmanlarının, stimullaşdırıcıların qeyri-düzgün qəbulu hansı nəticələrə aparıb çıxara bilər.